లేడీ డైరెక్టర్ తో కేజీఎఫ్ నిర్మాణ సంస్థ కొత్త మూవీ

కన్నడ చిత్రంగా విడుదలైన కేజీఎఫ్ 1 సినిమా దేశవ్యాప్తంగా ప్రేక్షకులను ఎంతగా అలరించిందో ప్రత్యేకంగా చెప్పనవసరం లేదు. ఇటీవల వచ్చిన కేజీఎఫ్ 2 కూడా అదే విధంగా సంచలన విజయాన్ని అందుకుంది. దేశవ్యాప్తంగానే కాక ప్రపంచవ్యాప్తంగా కూడా భారతీయ సినిమాకు గౌరవం తెచ్చిపెట్టిన సినిమాలివి. ఈ రెండు సినిమాలను ఎక్కడా రాజీ పడకుండా, ఎంతో భారీగా నిర్మించారు హోంబలే ఫిలిమ్స్ బ్యానర్ వారు. కేజీఎఫ్ సినిమాతో దర్శకుడు ప్రశాంత్ నీల్ కి, హీరో యష్ కి, ఇంకా మిగిలిన నటీనటులందరికీ పాన్ ఇండియా రేంజులో మంచి గుర్తింపు వచ్చింది. ఈ సినిమాను నిర్మించిన హోంబలే నిర్మాణ సంస్థకి కూడా మంచి పేరు వచ్చింది. తదుపరి సినిమాగా ఈ నిర్మాణ సంస్థలో ఎలాంటి సినిమా వస్తుందా అని అందరూ ఆసక్తి గా ఎదురు చూస్తుంటే..., ప్రేక్షకులకు సరికొత్త అనుభూతిని కలిగించేలా ఒక మహిళా దర్శకురాలితో సినిమా తీయబోతున్నట్టు అధికారిక ప్రకటన చేసింది. ఈ విషయాన్ని హోంబలే ఫిలిమ్స్ తన అధికారిక సోషల్ మీడియా ఖాతాల ద్వారా తెలిపింది. కొన్ని నిజమైన కథలు ప్రపంచానికి తెలియాలి. అదికూడా ఒక సరైన రీతిలో...., ప్రఖ్యాత దర్శకురాలు సుధా కొంగర తో మా తదుపరి సినిమాను సగర్వంగా ప్రకటిస్తున్నాము. మా గత చిత్రాల మాదిరిగానే భారత సినీ ప్రేక్షకులను విశేషంగా అలరించే రీతిలో, ఒక వాస్తవిక కథతో త్వరలో మీ ముందుకు రాబోతున్నాం.... అంటూ ఒక స్పెషల్ పోస్టర్ ను విడుదల చేసింది. పోతే... గురు, ఆకాశమే నీ హద్దురా వంటి ప్రయోగాత్మక చిత్రాలను తెరకెక్కించి ఘనవిజయాలనందుకున్నారు సుధా కొంగర. దీంతో ఈ కలయికపై ప్రేక్షకుల్లో మంచి అంచనాలు నెలకొన్నాయి.