త్వరలోనే శేఖర్ కమ్ముల నుండి లీడర్ మూవీ సీక్వెల్?
cinema | Suryaa Desk | Published : Wed, Apr 27, 2022, 11:06 PM
రానా దగ్గుబాటి హీరోగా చేసిన తొలి సినిమా లీడర్. 2010 లో విడుదలైన ఈ చిత్రానికి శేఖర్ కమ్ముల దర్శకత్వం వహించారు. తనదైన రీతిలో సున్నితమైన ప్రేమకథలను, కుటుంబ కథలను ఎంతో హృద్యంగా తెరకెక్కించే శేఖర్ రూటు మార్చి చేసిన చిత్రమిది. లీడర్ సినిమా కథ మొత్తం పొలిటికల్ బ్యాక్ డ్రాప్ లో నడుస్తుంది. ఈ మూవీ బాక్సాఫీస్ వద్ద పెద్ద ప్రభావం చూపించనప్పటికీ విమర్శకుల ప్రశంసలను గెలుపొందింది. ఫిలిం కంపానియన్ అనే పోర్టల్ నివేదిక ప్రకారం, ఈ దశాబ్దంలో విడుదలైన గొప్ప 25 తెలుగు సినిమాలలో లీడర్ ఒకటి. అలాంటి సినిమా టైటిల్ తో శేఖర్ కమ్ముల ఒక సినిమాను తెరకెక్కించబోతున్నారని టాక్. అది కూడా తెలుగు హీరోతో కాదండోయ్... కోలీవుడ్ స్టార్ హీరో సూర్య తో. ఎప్పటి నుండో డైరెక్ట్ తెలుగు సినిమా చెయ్యాలని కలలు కంటున్నాడు సూర్య. అలాంటి సూర్యకు ఇది ఒక గొప్ప అవకాశమనే చెప్పాలి. ఇటీవలనే జై భీం అనే పొలిటికల్ డ్రామాలో నటించి ప్రేక్షకులను మెప్పించిన సూర్య నుండి రాబోతున్న మరో పొలిటికల్ డ్రామా ఇది. అయితే... ఈ సినిమా లీడర్ కు సీక్వెల్ కాదని, కేవలం ఆ మూవీ టైటిల్ ను మాత్రమే తీసుకున్నారని, దానికి ఈ సినిమాకు అసలు సంబంధమే లేదని ప్రచారం జరుగుతుంది. ఈ విషయంలో ఎలాంటి అధికారిక ప్రకటన లేకపోవటంతో ప్రేక్షకుల్లో చాలా అనుమానాలు వస్తున్నాయి. త్వరలోనే శేఖర్ కమ్ముల స్పందించి వివరణ ఇస్తే కానీ ఈ విషయం పై క్లారిటీ వచ్చేలా లేదు.
|
|