హిందీ డిబేట్ లో దడదడలాడించిన సౌత్ నటి....

ఇటీవల ఒక మూవీ ఫంక్షన్లో పాల్గొన్న శాండల్ వుడ్ స్టార్ హీరో కిచ్చా సుదీప్ కన్నడ పరిశ్రమను మెచ్చుకుంటూ చేసిన వ్యాఖ్యలను బాలీవుడ్ స్టార్ హీరో అజయ్ దేవగణ్ మరోలా అర్ధం చేసుకుని సుదీప్ పై సోషల్ మీడియాలో మాటల యుద్ధానికి దిగిన విషయం తెలిసిందే కదా. ఎంతోమంది నెటిజన్లు సుదీప్ కు సపోర్ట్ చేయగా, మరికొంతమంది అజయ్ కు సపోర్ట్ గా నిలిచారు. ఇకపై హిందీ జాతీయ భాష కానే కాదు అని తాను పాల్గొన్న మూవీ ఫంక్షన్ కాంటెక్స్టు తగ్గట్టుగా సుదీప్ మాట్లాడారు. ఇది సహించని అజయ్ హిందీ జాతీయ భాష కానప్పుడు మీ మాతృభాషలో సినిమాలను హిందీలోకెందుకు డబ్ చేస్తున్నట్టు? అని ఫైర్ అయ్యాడు. దీంతో సోషల్ మీడియాలో చిన్న పాటి యుద్ధమే జరిగింది. ఆ తర్వాత సుదీప్ క్లారిటీ ఇవ్వటం, అజయ్ సారీ చెప్పటం, మాటల యుద్ధానికి తెర దించటం... అన్ని జరిగిపోయాయి. అయినా మీడియా ఈ విషయాన్ని మర్చిపోకుండా మరింత సాగదీస్తూ  ఒక హాట్ డిబేట్ ను ఏర్పాటు చేసింది. ఈ చర్చలో తన ఒపీనియన్ ను ఎంతో బలంగా వివరించింది సీనియర్ నటి అన్నమయ్య ఫేమ్ కస్తూరి. 

కస్తూరి... పలు తెలుగు, తమిళ, కన్నడ చిత్రాల్లో నటించింది. పెళ్లి చేసుకుని అమెరికా వెళ్ళిపోయిన కస్తూరి కొంతకాలం క్రితమే ఇండియాలో అడుగు పెట్టింది. ప్రస్తుతం సీరియల్స్ లో నటిస్తూ బిజీగా ఉంది. బాలీవుడ్ హాట్ డిబేట్ లో పాల్గొన్న కస్తూరి సౌత్ ను సపోర్ట్ చేస్తూ ఎంతో ధాటిగా మాట్లాడింది. బాగా చదువుకున్న చాలామంది సౌత్ ఇండియన్స్ హిందీ మాట్లాడేవాళ్ళతో తమకొచ్చిన హిందీని ముక్కలుముక్కలుగా అయినా మాట్లాడతారు. కానీ ఏ నార్త్ ఇండియన్ కూడా ఒక్క ముక్క దక్షిణాది భాషలో మాట్లాడరెందుకు? అని కస్తూరి నార్త్ మీడియాని ప్రశ్నించింది. నార్త్ - ఈస్ట్ ప్రజలు కానీ, మిగిలిన రాష్ట్రాల్లో ఉండే ప్రజలు కానీ హిందీ కన్నా ఇంగ్లీష్ భాషనే మాట్లాడటానికి మక్కువ చూపిస్తారని కస్తూరి అభిప్రాయపడింది. దక్షిణాది ప్రజలపై అలానే నార్త్ - ఈస్ట్ రాష్ట్రాల ప్రజలపై  హిందీ భాష చూపిస్తున్న బలమైన ప్రభావాన్ని మీడియా ముందు కస్తూరి తనగొంతులో బలంగా వినిపించింది. దీంతో కస్తూరి పేరు హాట్ టాపిక్ గా మారింది.