నార్త్ థియేటర్ల వద్ద ఆగని రాఖీభాయ్ క్రేజ్... హిందీ సినిమాలను వెనక్కి నెడుతూ...

విడుదలకు ముందు కేజీఎఫ్ 2 చిత్రం మీద ఎన్ని భారీ అంచనాలున్నాయో, ఆ సినిమా విడుదలైన తర్వాత వాటికి మించి రికార్డులను సృష్టిస్తూ, అందరినీ ఆశ్చర్యానికి గురిచేస్తుంది. ప్రపంచవ్యాప్తంగా వెయ్యి కోట్లు సాధించిన మూడో సినిమాగా చరిత్ర సృష్టించిన కేజీఎఫ్ 2 విడుదలై మూడు వారాలు గడుస్తున్నప్పటికీ థియేటర్ల వద్ద రద్దీ ఏ మాత్రం తగ్గకపోవడం విశేషం. ముఖ్యంగా ఉత్తరాదిన కేజీఎఫ్ 2 రేపుతున్న సంచలనం అంతా ఇంతా కాదు. హిందీ సినిమాలను సైతం వెనక్కినెట్టి నార్త్ లో తొలిరోజు అత్యధిక వసూళ్లు సాధించిన సినిమాగా అగ్రపథాన కొనసాగుతున్న కేజీఎఫ్ 2 ఇప్పటికే రూ. 360.31 కోట్లను బాలీవుడ్ బాక్సాఫీస్ నుండి రాబట్టింది. ఒకవేళ రాఖీభాయ్ సందడి బాలీవుడ్ థియేటర్ల వద్ద ఇలానే జోరుగా సాగిందంటే, ఖచ్చితంగా రూ. 500 కోట్లను వసూలు చేస్తుందని సినీ విశ్లేషకుల అంచనా. ఎన్ని హిందీ సినిమాలు రిలీజవుతున్నా అవన్నీ కేజీఎఫ్ 2 ముందు దిగదుడుపేనని ప్రూవ్ అవుతోంది. ఇటీవలనే బాలీవుడ్ స్టార్ హీరో టైగర్ ష్రాఫ్ సినిమా హీరోపంటి 2, సీనియర్ స్టార్ హీరో అజయ్ దేవగణ్ నటించిన రన్ వే 34 సినిమాలు బాలీవుడ్ థియేటర్లలో విడుదలయ్యాయి. ఈ రెండు సినిమాల తొలిరోజు కలెక్షన్లు ప్రస్తుత కేజీఎఫ్ 2 కలెక్షన్లను ఏమాత్రం అందుకోలేకపోయాయి. హీరోపంతి 2 ఈ ఆదివారం 4.5 కోట్లు వసూలు చేయగా, రన్ వే 34 రూ. 5.25 కోట్లను కలెక్ట్ చేసిందట. కానీ రాఖీభాయ్ మాత్రం 7.25 కోట్లు వసూలు చేసాడు. కొత్త గా విడుదలైన వాటిలో ప్రముఖ స్టార్లు నటించినా కానీ ఆ ఛరిష్మా ఏదీ పని చేయలేదు.  బచ్చన్ పాండే- ఎటాక్ -యు జెర్సీ వంటి కొత్త సినిమాలు కేజీఎఫ్ హవా ముందు ఏమాత్రం నిలవలేకపోయాయి.