'జయమ్మ పంచాయితీ' తో సుమ ప్రేక్షకులను ఆకట్టుకుందా? పబ్లిక్ ఏమంటుంది?...

ఎన్నో మూవీ ఈవెంటులను, టాక్ షోలను, లైవ్ షోలను, రియాలిటీ షోలను ఒంటిచేత్తో నడిపించి, వాటిని సూపర్ సక్సెస్ చేసిన ఏకైక టెలివిజన్ హోస్ట్ సుమ కనకాల. నటిగా తెలుగు తెరకు పరిచయమైన ఈ మలయాళీ ఆ తర్వాత యాంకర్ గా రాణించింది , తాజాగా తిరిగి నటిగాను మారి ప్రేక్షకుల్లో ఆసక్తిని రేకెత్తిస్తుంది. సుమ లీడ్ రోల్ లో నటించిన 'జయమ్మ పంచాయితీ' చిత్రం నేడు విడుదలైంది. విజయ్ కలివరపు డైరెక్షన్లో ఒక కామెడీ విలేజ్ డ్రామాగా తెరకెక్కిన ఈ సినిమా పట్ల ప్రేక్షకుల అభిప్రాయం ఎలా ఉందో చూద్దామా... 

తన యాంకరింగ్ తో ప్రేక్షకులని ఆకట్టుకునే సుమ, జయమ్మ పాత్రలో నటించటం కాదు జీవించిందని, వన్ విమెన్ షో అంటూ ప్రేక్షకులు సుమకు కితాబిస్తున్నారు. ఒక పక్క అమాయకంగా కనబడుతూనే మరోపక్క చాలా కమాండింగ్ గా, ఎలాంటి విషయంలో వెనకడుగు వేయని వ్యక్తిగా అనేక షేడ్స్ ఉన్న పాత్రలో నటించి సుమ మెప్పించింది. ఇప్పటివరకు ఏ తెలుగు సినిమా లో లేని కథతో, కథనాలతో తెరకెక్కిన ఈ  మూవీ కి ఎం.ఎం కీరవాణి అందించిన మ్యూజిక్, బ్యాక్ గ్రౌండ్ మ్యూజిక్ మరింత బలాన్నిచ్చాయి. జయమ్మ పంచాయితీ సినిమా మొత్తం శ్రీకాకుళం జిల్లా పాలకొండ లోని ఒక కుగ్రామంలో జరుగుతుంది. సినిమాటోగ్రాఫర్ అనూష్ కుమార్ శ్రీకాకుళం లోని స్వచ్ఛదనాన్ని, పచ్చదనాన్ని చాలా చక్కగా చూపించారు. ఈ సినిమాకు దర్శకుడి టేకింగ్, సుమ అద్భుతమైన నటన, కీరవాణి సంగీతం, తో పాటు సినిమాటోగ్రఫీ కూడా వెన్నుదన్నుగా నిలిచాయి. నిర్మాతలు కొత్త వారు అయినా ఎక్కడా కూడా రాజీ పడినట్లు కనిపించలేదు. అయితే రెండో భాగం విషయంలో ఎడిటింగ్ మీద కొంచెం శ్రద్ధ వహిస్తే బాగుండు అనిపిస్తుంది. మొత్తంగా సుమ 'జయమ్మ పంచాయితీ' మూవీ ఈ వీకెండ్ కు చక్కని అనుభూతిని ఇస్తుంది.