వచ్చే నెల్లో ... అక్కడ జరగనున్న నయనతార వివాహం..!

తమిళ లేడీ సూపర్ స్టార్ నయనతార ప్రస్తుతం మెగాస్టార్ చిరంజీవి 153వ చిత్రమైన గాడ్ ఫాదర్ లో నటిస్తున్న విషయం తెలిసిందే.  నయనతార సినీ కెరీర్ ప్రేక్షకులకి ఎంత సుపరిచితమో ఆమె పర్సనల్ లైఫ్ కూడా అంతే సుపరిచితం. ప్రభుదేవా తో ప్రేమబంధం ముగిసిన తర్వాత సినిమాలకు కూడా దూరమవుతానని చెప్పిన నయన్ మనసు మార్చుకుని మళ్ళీ సినిమాలు చేస్తుంది. 2015లో నయన్ చేసిన 'నేనూ..రౌడీనే' మూవీ డైరెక్టర్ విగ్నేష్ శివన్ తో ప్రేమ వ్యవహారం నడిపిస్తున్న విషయం తెలిసిందే. ఆ మధ్య ఒక ఇంటర్వ్యూలో వారిద్దరికీ నిశ్చితార్ధం జరిగిపోయిందనీ తెలిపింది నయన్. ఇటీవలనే ఒక గుడిలో ప్రత్యేక పూజలు నిర్వహించిన నయనతార నుదిటిపై కుంకుమ ఉండటంతో విఘ్నేష్, నయన్ ల పెళ్లి జరిగిపోయిందని ప్రచారం జరిగింది. అయితే, ఇలాంటి రూమర్లపై నయనతార కానీ, విఘ్నేష్ కానీ ఎలాంటి వివరణ ఇవ్వకపోవటంతో అభిమానుల్లో ఉన్న అనుమానాలు అలానే ఉన్నాయి. దీంతో ఇలాంటి పుకార్లు మళ్ళీ మళ్ళీ పుడుతూనే ఉంటాయి కదా. తాజాగా అదే జరిగింది. నయనతార, విఘ్నేష్ శివన్ ల వివాహం జూన్ 9న, ఆంధ్రప్రదేశ్ లోని తిరుమల కొండపై అంగరంగ వైభవంగా జరగనుందని కోలీవుడ్ లో విస్తృత ప్రచారం జరుగుతుంది. పెళ్లి తర్వాత రిసెప్షన్ కూడా చాలా గ్రాండ్ గా నిర్వహించనున్నారట. దీనికి సంబంధించి త్వరలోనే అధికారిక ప్రకటన వెలువడనుందట. 

అయితే .... నయనతార వయసు ఎలా పెరుగుతుందో ఆమెకు వచ్చే సినిమా అవకాశాలు కూడా పెరుగుతున్నాయే తప్ప కొంచెం కూడా తగ్గట్లేదు. ప్రస్తుతం ఆమె చేతిలో చిరంజీవి గాడ్ ఫాదర్, షారూఖ్ ఖాన్ లయన్ వంటి పెద్ద ప్రోజెక్టులున్నాయి. ఇటీవలనే విడుదలైన కాతువాకల రెండు కాదల్ సినిమా మంచి విజయం సాధించింది. ఇందులో విజయ్ సేతుపతి హీరోకాగా, నయన్, సమంత హీరోయిన్లుగా నటించారు. ఈ సినిమాకు విఘ్నేష్ దర్శకత్వం వహించటం విశేషం. మరి ఇప్పుడు వస్తున్న పెళ్లి రూమర్లు కనక నిజమైతే, పెళ్లి తర్వాత కూడా నయనతార యాక్టింగ్ ను కంటిన్యూ చెయ్యాలని ఆమె అభిమానులు కోరుకుంటున్నారు.