సలార్ అప్డేట్ ఇవ్వకపోతే సూసైడే .. ప్రశాంత్ నీల్ కు డార్లింగ్ అభిమాని హెచ్చరిక

సినీతారలపై ప్రేక్షకులు ఒక్కొక్కరు ఒక్కోలా అభిమానం చూపిస్తారు. కొంతమంది తమ అభిమాన నటుల పేరుతో సేవా కార్యక్రమాలు చేస్తే, మరికొంతమంది శరీరంపై పచ్చబొట్లను పొడిపించుకుంటారు. ఎవరి అభిమానం వారిది. తాజాగా డార్లింగ్ ప్రభాస్ వీరాభిమాని ఒకరు సలార్ మూవీ నుండి అప్డేట్ ఇవ్వకపోతే సూసైడ్ చేసుకుంటానంటూ దర్శకుడు ప్రశాంత్ నీల్ కు బెదిరింపు లేఖ రాసాడు.    

కేజీఎఫ్ తో దేశవ్యాప్త సంచలన దర్శకుడిగా మారిన ప్రశాంత్ నీల్ తన తదుపరి సినిమా 'సలార్' ను రెబల్ స్టార్ ప్రభాస్ తో చేస్తున్నారన్న విషయం తెలిసిందే. ఈ సినిమా ఎప్పుడో స్టార్ట్ అయ్యింది, అయితే ఇప్పటికీ ఈ మూవీ షూటింగ్ పూర్తి కాలేదు. ఇందుకు అనేక కారణాలున్నాయి. ఏదిఏమైనా అభిమానులకు మాత్రం తమ అభిమాన నటుడి మూవీ అప్డేట్ లు మాత్రం కావాల్సిందే. డార్లింగ్ ఫ్యాన్స్ కు ఈ సినిమా మరింత కీలకం. ఎందుకంటే బాహుబలి తో ప్రపంచవ్యాప్త గుర్తింపు తెచ్చుకున్న ప్రభాస్ ఆ తర్వాత చేసిన సాహో, రాధేశ్యామ్ రెండు కూడా బాక్సాఫీస్ వద్ద డిజాస్టర్లుగా నిలిచాయి. ప్రభాస్ తదుపరి సినిమాలు సలార్, ప్రాజెక్ట్ కే, ఆదిపురుష్. వీటిల్లో ఆదిపురుష్ వచ్చే సంవత్సరం సంక్రాంతికి రానుండగా, ప్రాజెక్ట్ కే 2024 కి ఫిక్స్ అయ్యింది. ఇక మిగిలింది సలార్ ఒక్కటే. అయినా ఆ రెండు సినిమాలు డివోషనల్, సైన్టిఫిక్ జోనర్ లో సాగుతాయి. సలార్ ఒక్కటే ప్రభాస్ నుండి రాబోతున్న ఔటండౌట్ మాస్ యాక్షన్ ఎంటర్టైనర్. ఈ సినిమాపై ప్రభాస్ అభిమానులు బోలెడంత ఆశలు పెట్టుకున్నారు. సినిమా ప్రారంభమైనప్పుడు విడుదల చేసిన ప్రభాస్ ఫస్ట్ లుక్ తప్పించి, ఇంకా ఏ అప్డేట్ కూడా ఈ మూవీ నుండి రాలేదు. మే నెల్లో సలార్ నుండి క్రేజీ అప్డేట్ వస్తుందని కేజీఎఫ్ ప్రమోషన్స్ సమయంలో ప్రశాంత్ నీల్ చెప్పారు. అయితే, అది ఇప్పటివరకు రాకపోవడంతో విసుగెత్తిన ప్రభాస్ వీరాభిమాని ప్రశాంత్ నీల్ కు సూసైడ్ చేసుకుంటానంటూ బెదిరింపు లేక రాసాడు. ప్రస్తుతం ఈ లేఖ నెట్టింట ట్రెండ్ అవుతుంది. అయితే, ఈ విషయంపై ప్రశాంత్ నీల్ అండ్ టీం స్పందిస్తారా లేదా అన్నది ఆసక్తికరం గా మారింది.