ఆగస్టు వార్... ఏజెంట్ తయార్

మోస్ట్ ఎలిజిబుల్ బ్యాచిలర్ తర్వాత అక్కినేని అఖిల్ నుండి రానున్న కొత్త చిత్రం ఏజెంట్. సురేందర్ రెడ్డి దర్శకత్వంలో, ఏకే ఎంటర్టైన్మెంట్స్ బ్యానర్ పై అనిల్ సుంకర భారీ యాక్షన్ ఎంటర్టైనర్గా ఈ చిత్రాన్ని తెరకెక్కిస్తున్నారు. ఈ సినిమాలో మలయాళ మెగా స్టార్ మమ్ముట్టి ఒక కీలక పాత్ర పోషిస్తున్నారు. సాక్షి వైద్య హీరోయిన్ గా నటిస్తున్న ఈ చిత్రానికి హిప్ హప్ తమిళ సంగీతం అందిస్తున్నారు. ఈ మూవీ ఆగస్టు 12న ప్రేక్షకుల ముందుకు రానుంది. అదే రోజు మెగాస్టార్ చిరంజీవి గాడ్ ఫాదర్, సమంత యశోద సినిమాలు విడుదల అవుతుండటంతో ఏజెంట్ సినిమా వాయిదా పడుతుందని గత కొద్దిరోజులుగా చిత్రసీమలో ఒక రేంజులో ప్రచారం జరిగింది. అయితే, చిరంజీవి సమంత సినిమాలలో యశోద ఒక్కటే విడుదల తేదీని అధికారికంగా ప్రకటించింది. చిరంజీవి గాడ్ ఫాదర్ ఇంకా రిలీజ్ డేట్ ను రివీల్ చెయ్యలేదు కానీ ఆగస్టు 12న గాడ్ ఫాదర్ రాక ఖచ్చితమే అని కొందరి వాదన. ఆల్రెడీ మలయాళంలో సూపర్ హిట్ ఐన సినిమానే కాబట్టి తెలుగులో ఈ సినిమా విజయం లాంఛనమే అని అనుకుంటున్నారు. ఈ నేపథ్యంలో అఖిల్ ఏజెంట్ విడుదలైతే ఆ సినిమాకు ప్రేక్షకుల రాక తక్కువగా ఉండొచ్చు. కలెక్షన్ల పరంగా కూడా అఖిల్ సినిమా పై గాడ్ ఫాదర్ ప్రభావం బాగానే ఉండనుంది. ఇవన్నీ ఆలోచించే ఏజెంట్ చిత్రబృందం సినిమా విడుదల తేదీ గురించి పునరాలోచన చేస్తుందనే వార్తలను ఏజెంట్ నిర్మాత అనిల్ సుంకర కేవలం పుకార్లే అని కొట్టిపారేశారు. ఇలాంటి పుకార్లను అక్కినేని అభిమానులు నమ్మొద్దు. త్వరలోనే ఈ మూవీ టీజర్ పై బిగ్ అప్డేట్ ఇస్తాం... అంటూ పేర్కొన్నారు. అంటే ఆగస్టు వార్ నుండి ఏజెంట్ అఖిల్ తప్పుకోలేదు. యుద్ధానికి సన్నద్ధమవుతున్నాడన్న మాట. ఇటీవలే వైజాగ్ షెడ్యూల్ ను పూర్తి చేసుకున్న ఈ చిత్రబృందం త్వరలోనే హిమాచల్ ప్రదేశ్ లో మరో షెడ్యూల్ ని మొదలుపెట్టబోతున్నారు.