ఆగస్టు వార్ లో మరో స్టార్ హీరో సినిమా

ఈ ఏడాది ఆగస్టు నెల లో పలు స్టార్ హీరోల సినిమాలు విడుదల కాబోతున్నాయి. ఒకే నెల్లో అది కూడా ఒక వారంలోనే టాలీవుడ్, కోలీవుడ్, బాలీవుడ్ ల నుండి పలు సినిమాలు బాక్సాఫీస్ వద్ద తలపడబోతున్నాయి. దీంతో బిగ్ బాక్సాఫీస్ క్లాష్ ఏర్పడబోతుందని ట్రేడ్ అనలిస్టులు తేల్చి చెప్తున్నారు.   

బాలీవుడ్ మిస్టర్ పర్ఫెక్ట్ ఆమీర్ ఖాన్, కరీనాకపూర్ ఖాన్ జంటగా నటించిన చిత్రం లాల్ సింగ్ చద్దా. అద్వైత్ చందన్ దర్శకత్వం వహించిన ఈ సినిమాని ఆగస్టు 11న విడుదల చేయబోతున్నట్టు మేకర్స్ అధికార ప్రకటన చేసారు. ఇందులో టాలీవుడ్ యువనటుడు నాగచైతన్య కీ రోల్ ప్లే చేసారు. ప్రస్తుతం సౌత్ సినిమాలు నార్త్ లో హవా చూపిస్తున్నందున లాల్ సింగ్ చద్దా సినిమాతో ఆమీర్ ఖాన్ బాలీవుడ్ సత్తా ఏంటో దేశవ్యాప్తంగా చూపిస్తారని బాలీవుడ్ జనాలు ఎంతో ఆసక్తితో ఈ సినిమా కోసం ఎదురు చూస్తున్నారు. 

ఆచార్య వంటి భారీ డిజాస్టర్ ను తదుపరి చిత్రం గాడ్ ఫాదర్ తో తుడిచి పెట్టి తిరిగి సక్సెస్ ట్రాక్ లోకి రావాలని మెగాస్టార్ చిరు కోరుకుంటున్నారు. నయనతార ఫిమేల్ లీడ్ లో నటిస్తున్న ఈ చిత్రాన్ని మోహన్ గాంధీ డైరెక్ట్ చేస్తున్నారు. ఈ సినిమాను స్వాతంత్య్ర దినోత్సవ సందర్భంగా ఆగస్టు 11 లేదా 12 తారీఖుల్లో విడుదల చేయబోతున్నారని సమాచారం. అయితే, ఈ విషయంపై ఎలాంటి అధికారిక సమాచారం లేదు. 

మోస్ట్ ఎలిజిబుల్ బ్యాచిలర్ తర్వాత అక్కినేని అఖిల్ నుండి రానున్న కొత్త చిత్రం ఏజెంట్. సురేందర్ రెడ్డి దర్శకత్వంలో, ఏకే ఎంటర్టైన్మెంట్స్ బ్యానర్ పై అనిల్ సుంకర భారీ యాక్షన్ ఎంటర్టైనర్గా ఈ చిత్రాన్ని తెరకెక్కిస్తున్నారు.  ఈ మూవీ ఆగస్టు 12న ప్రేక్షకుల ముందుకు రానుంది.

సమంత నటిస్తున్న లేడీ ఓరియెంటెడ్ చిత్రం యశోద, పాన్ ఇండియా లెవెల్లో ఆగస్టు 12న విడుదలకాబోతుంది. ఈ సినిమాలన్నీ ఆగస్టు బెర్తును ఖరారు చేసుకోగా తాజాగా మరో స్టార్ హీరో కూడా తన సినిమాను ఆగస్టు వార్ లో దింపుతున్నట్టు అధికారికంగా ప్రకటించారు. కోలీవుడ్ స్టార్ హీరో విక్రమ్ కొత్త చిత్రం కోబ్రా ఆగస్టు 11న విడుదలకాబోతుందని మేకర్స్ తెలిపారు.  ఈ చిత్రానికి ఏ. ఆర్. రెహ్మాన్ సంగీతం అందిస్తున్నారు. ఈ సినిమాలో విక్రమ్ 20 భిన్న రకాల పాత్రలలో కనిపించి ప్రేక్షకులకు కనువిందు చేయనున్నాడట.