నా ప్రయాణం అలా మలుపు తిరిగింది

ఏ భాషలో నటించినా…నేను తెలుగమ్మాయినే కదా!. అందుకే తెలుగు సినిమాలో అవకాశం రాగానే వెంటనే ఓకే చెప్పేశాను అని నూతన కథానాయిక శోభిత ధూళిపాళ చెప్పుకొచ్చారు. అడివి శేష్‌, శోభిత ధూళిపాళ నాయకానాయికలుగా రూపొందిన గూఢచారి చిత్రం విడుదలకు సిద్ధమైంది. ఈ సందర్భంగా శోభిత ధూళిపాళ కొద్దిసేపు ముచ్చటించారు. ఆ వివరాలేమిటో ఆమె మాటల్లో…

మా స్వస్థలం తెనాలి. అయితే నేను పెరిగిందంతా వైజాగ్‌లో. అక్కడ ప్లస్‌ టు చదివాక ముంబై వెళ్లాను. ముంబైలో డిగ్రీ చేసిన తర్వాత మిస్‌ ఇండియా ఫోటీలకు వెళ్లాను. మిస్‌ ఇండియా టైటిల్‌ గెలుచుకున్న తర్వాత మోడలింగ్‌ రంగంలోకి అడుగుపెట్టాను. మా ఇంట్లో వాళ్లకు సినిమాల గురించి అంతగా తెలియదు. సరదాగా మిస్‌ ఇండియా పోటీలకు వెళ్లి గెలవడంతో నా ప్రయాణం ఊహించనివిధంగా మలుపు తిరిగింది. నేను ఎప్పుడూ నటిని అవుదామని అనుకోలేదు. అనురాగ్‌ కశ్యప్‌తో హిందీలో తొలి సినిమా చేశా. ఆ తర్వాత కేన్స్‌ ఫెస్టివల్‌కు వెళ్లినపుడు గూఢచారి చిత్రం కోసం అడివి శేష్‌ ఫోన్‌ చేశారు. అక్కడి నుంచి వచ్చిన తర్వాత ఈ చిత్రకథ విన్నా. చాలాబాగా నచ్చడంతో వెంటనే అంగీకరించేశా. సినిమాల్లో నటించే విషయంపై మా తల్లిదండ్రులు నాకెంతో సపోర్ట్‌ ఇచ్చారు.

తెలుగు సినిమా గురించి అందరూ మాట్లాడుకుంటున్నారు

ఎన్ని భాషల్లో నటించినా….నేను తెలుగమ్మాయినే. తెలుగులో అవకాశం రాగానే చాలా సంతోషంగా అనిపించింది. ఈ సినిమాకు ముందు అడివి శేష్‌ నటించిన క్షణం చిత్రం చూశాను. ఇప్పుడు తెలుగు సినిమా గురించి అందరూ మాట్లాడుకుంటున్నారు. ప్రస్తుతం చాలా మంచి దశలో ఉన్నాం. అలాంటప్పుడు ఏ భాషలో నటించినా ఏముంది? ద్విభాషలలో రూపొందిన ఓ మలయాళ చిత్రం కూడా చేశా. ఇక ముంబైకి వెళ్లినపుడే నేను హిందీ నేర్చుకున్నా. చిన్నప్పట్నుంచి ఏదైనా కొత్తగా నేర్చుకోవడమంటే నాకు చాలా ఇష్టం. భరత నాట్యం, కథక్‌ కూడా నేర్చుకున్నా. విద్యార్థినిగా ఉన్నప్పుడు కూడా అన్నింటిలోనూ ఫస్ట్‌ మార్కులే.

తెలుగులో అవకాశాలొస్తున్నాయి

మిస్‌ ఇండియా టైటిల్‌ గెలిచినపుడే తమ సినిమాల్లో నటించమనికొంతమంది నన్ను సంప్రదించారు. అయితే అప్పుడు నేను నటించాలనుకోలేదు. దాంతో ఏమీ చెప్పలేకుండా పోయాను. తాజాగా గూఢచారి చిత్రం టీజర్‌ విడుదలైన తర్వాత మళ్లిd కొంతమంది సంప్రదిస్తున్నారు అంటూ ముగించారు.