సూర్య పాత్రపై "విక్రమ్" మూవీ టీం మౌనం... అందుకేనా?

విభిన్న పాత్రలలో నటించి, కెరీర్ లో ఎక్కువశాతం ప్రయోగాత్మక సినిమాలనే చేసిన కోలీవుడ్ హీరో సూర్య. తాజాగా ఆయన విక్రమ్ సినిమాలో గెస్ట్ రోల్ చేసారు. అయితే, ఈ విషయాన్ని చాన్నాళ్లు బయటపెట్టకుండా, గుట్టుగా దాచిన చిత్రబృందం ఈ మధ్యనే అధికారికంగా ప్రకటించింది. విక్రమ్ ఆడియో ఫంక్షన్లో డైరెక్టర్ లోకేష్ కనగరాజ్ సూర్య అతిధి పాత్ర చేస్తున్నాడంటూ అభిమానులకు క్లారిటీ ఇచ్చారు. కానీ, సూర్య పాత్ర పై చిన్న హింట్ ను కూడా ఇవ్వలేదు. తమ అభిమాన హీరో ప్రతిష్టాత్మకంగా రూపొందిన మరో స్టార్ హీరో సినిమాలో అతిధి పాత్ర చేస్తున్నాడంటే, అభిమానుల అంచనాలు ఏ రేంజులో ఉంటాయో ఊహించుకోండి. వారి అంచనాలను నూరు శాతం అందుకోవడానికి సూర్య రోల్ ను రివీల్ చెయ్యట్లేదట విక్రమ్ మూవీ టీం. 

లోకేష్ కనగరాజ్ డైరెక్షన్లో విశ్వనటుడు కమల్ హాసన్ నటిస్తున్న యాక్షన్ థ్రిల్లర్ విక్రమ్. ఈ సినిమాకు రైటర్ గా పని చేసిన రత్న కుమార్ సూర్య పాత్ర ఎలా ఉంటుందో చెప్పి అభిమానుల్లో కుతూహలం రేపారు. విక్రమ్ సినిమాలో సూర్య పాత్ర తెరపై కనిపించినంత సేపు సినిమా వేరే లెవెల్లో ఉంటుందని, ఎవరూ ఊహించని పాత్రలో సూర్య ఈ సినిమాలో నటించారని ఆయన చెప్పారు. అలాంటి పాత్రలో సూర్యను చూసిన అభిమానుల ఆనందంతో అరుపులు, కేకలు, విజిల్స్ తో థియేటర్లు దద్దరిల్లి పోతాయని ఆయన అన్నారు. ఈ చిత్రంలో విలక్షణ నటులైన విజయ్ సేతుపతి, ఫాహద్ ఫాజిల్ కీలక పాత్రలు పోషిస్తున్నారు. ఇంత భారీ తారాగణం ఉన్న ఈ సినిమాలో, తెరపై ఎవరిని చూడాలో తెలియక ప్రేక్షకులు తప్పక కన్ఫ్యూజ్ అవుతారని రత్నవేలు తెలిపారు.  జూన్ 3న తమిళ్, తెలుగు, హిందీ భాషల్లో విడుదలవబోతున్న ఈ చిత్రం కోసం అభిమానులు ఎదురుచూస్తున్నారు.