ఒక మిలియన్ డాలర్ లిస్టులో ఎఫ్ 3... ఓవర్సీస్ లో అనిల్ హ్యాట్రిక్
cinema | Suryaa Desk | Published : Tue, May 31, 2022, 12:32 PM
టాలీవుడ్ ట్యాలెంటెడ్ డైరెక్టర్ అనిల్ రావిపూడి నుండి వచ్చిన కొత్త చిత్రం ఎఫ్ 3. వెంకటేష్, వరుణ్ తేజ్ లు కలిసి నటించిన మల్టీస్టారర్ చిత్రమిది. ఇందులో వేంకటేష్ కు జోడిగా మిల్కీ బ్యూటీ తమన్నా, వరుణ్ తేజ్ కు జతగా మెహ్రీన్ నటించారు. సునీల్, రాజేంద్రప్రసాద్, సోనాల్ చౌహన్ కీలక పాత్రల్లో నటించారు. శ్రీ వెంకటేశ్వర క్రియేషన్స్ బ్యానర్ పై దిల్ రాజు నిర్మించిన ఈ చిత్రం గత శుక్రవారం విడుదలైంది. తొలి షోతోనే హిట్ టాక్ తో రన్ అవుతున్న ఈ చిత్రం ఇరు తెలుగు రాష్ట్రాలలో నవ్వుల పువ్వులు పూయిస్తుంది. కరోనా వల్ల థియేటర్లకు ఫ్యామిలీ ఆడియన్స్ రాక తగ్గిన వేళ, ఎఫ్ 3 సినిమా తిరిగి ఫ్యామిలీ ఆడియన్స్ ను థియేటర్లకు రప్పించింది. తమకున్న కష్టాలను మర్చిపోయి ఇంటిల్లిపాది రెండున్నర గంటలు హాయిగా నవ్వుకునే చిత్రం కావడంతో ఎఫ్ 3 కి మధ్య తరగతి కుటుంబ సభ్యుల రాక ఎక్కువగా ఉంది. అదీగాక, సాధారణ టికెట్ రేట్లతోనే ఎఫ్ 3 మూవీ అందుబాటులోకి రావడం విజయానికి మరొక కారణం. ఇదిలా ఉంటే, ఎఫ్ 3 మూవీ ఓవర్సీస్ లో కూడా దుమ్ము రేపుతోంది. ఈ వారాంతానికల్లా ఒక మిలియన్ డాలర్ల వసూళ్లను సాధించింది. దీంతో, అనిల్ రావిపూడి డైరక్ట్ చేసిన చిత్రాలలో ఒక మిలియన్ డాలర్ వసూళ్లు సాధించిన మూడవ చిత్రంగా ఎఫ్ 3 రికార్డు సృష్టించింది. ఈ లిస్టులో ఎఫ్ 2, సరిలేరు నీకెవ్వరూ చిత్రాలు ఎఫ్ 3 కన్నా ముందున్నాయి.
|
|