పవర్ స్టార్ సినిమాలో "రొమాంటిక్" బ్యూటీకి ఛాన్స్?
cinema | Suryaa Desk | Published : Tue, Jun 14, 2022, 04:12 PM
పూరి జగన్నాధ్ తనయుడు ఆకాష్ పూరి హీరోగా నటించిన "రొమాంటిక్" సినిమాతో తెలుగు తెరకు పరిచయమైన యంగ్ అండ్ గ్లామర్ బ్యూటీ కేతికశర్మ. తొలి సినిమాలోనే కావాల్సింత గ్లామర్ షో చేసి తగినంత గుర్తింపును, యువతలో క్రేజ్ ను సంపాదించుకుంది. ఆ వెంటనే నాగశౌర్య "లక్ష్య" సినిమాలో హీరోయిన్ గా నటించింది. ఈ సినిమా బాక్సాఫీస్ వద్ద పెద్ద ప్రభావం చూపించనప్పటికీ కేతికకు మంచి మార్కులే పడ్డాయి. తదుపరి మెగామేనల్లుడు వైష్ణవ్ తేజ్ సరసన "అంగరంగవైభవంగా" సినిమాలో నటిస్తుంది. ఈ సినిమా విడుదల కావలసి ఉంది. ఈ నేపథ్యంలో తాజాగా కేతికకు ఒక గోల్డెన్ ఛాన్స్ తలుపుతట్టినట్టు తెలుస్తుంది. అదేంటంటే, పవర్ స్టార్ పవన్ కళ్యాణ్ తమిళ రీమేక్ "వినోదయ సిత్తం" లో కేతిక ఛాన్స్ కొట్టేసిందని ఇండస్ట్రీ టాక్. విలక్షణ నటుడు సముద్రఖని డైరెక్షన్లో తెరకెక్కిన తమిళ్ మూవీ వినోదయ సిత్తం ను తెలుగులో పవన్ కళ్యాణ్, సాయిధరమ్ తేజ్ పెట్టి రీమేక్ చేద్దామనే ఆలోచనలో ఉన్నారు. ఇందులో సాయిధరమ్ కు జోడిగా కేతిక ఎంపికైనట్టు తెలుస్తుంది. ఈ సినిమా పై ఇప్పటివరకు ఎలాంటి అధికారిక ప్రకటన లేదు. కానీ రోజూ ఈ ప్రాజెక్ట్ పై వచ్చే వార్తలు కోకొల్లలు.
|
|