ట్రైలర్ టాక్ : తండ్రి కోసం "గార్గి" చేసే న్యాయపోరాటం
cinema | Suryaa Desk | Published : Thu, Jul 07, 2022, 07:22 PM
కెరీర్ తొలినాళ్ళనుండి గ్లామర్ రోల్స్ కు దూరంగా, నటనకు ఆస్కారమున్న పాత్రలకు దగ్గరగా ఉంటున్న సాయి పల్లవి ఇటీవలే "విరాటపర్వం" సినిమాతో ప్రేక్షకులను పలకరించింది. వెన్నెలగా అద్భుతమైన నటనను ప్రదర్శించిన పల్లవి విరాటపర్వం సినిమాతో తన అభిమానగణాన్ని మరింత పెంచుకుంది.
సాయి పల్లవి నటిస్తున్న మరో లేడి ఓరియెంటెడ్ చిత్రం "గార్గి". గౌతమ్ రామచంద్రన్ దర్శకత్వంలో బహుభాషా చిత్రంగా రూపొందుతున్న గార్గి లో సాయి పల్లవి ప్రధాన పాత్రను పోషిస్తుంది. ఈ మూవీకి గోవింద్ వసంత్ మ్యూజిక్ అందించారు. తండ్రి ఆకస్మిక అరెస్టుతో అప్పటివరకు సంతోషంగా, చీకూచింతా లేకుండా సాగిపోతున్న గార్గి జీవితం ఒక్కసారిగా తలకిందులవుతుంది. తండ్రిని జైలు నుండి విడిపించేందుకు న్యాయ పోరాటం చేస్తున్న మధ్యతరగతి యువతిగా సాయి పల్లవి ఇందులో నటించనుంది. ఆద్యంతం ఎమోషనల్ గా సాగిన ఈ ట్రైలర్ సినిమాపై ఆసక్తిని రేకెత్తించే విధంగా ఉంది. తెలుగు, తమిళం, కన్నడ, మలయాళ భాషలలో జీని మరియు మై లెఫ్ట్ ఫుట్ ప్రొడక్షన్ బ్యానర్లపై రవిచంద్రన్ రామచంద్రన్, ఐశ్వర్య, థామస్ జార్జ్, గౌతమ్ రామచంద్రన్ నిర్మిస్తున్నారు. తెలుగులో రానా దగ్గుబాటి, తమిళంలో సూర్య, జ్యోతిక దంపతులు ఈ సినిమాను సమర్పిస్తున్నారు.
|
|