ఆ కలలన్నీ నెరవేరాక పెళ్లి గురించి ఆలోచిస్తా : కీర్తిసురేష్‌

 ప్రస్తుతానికి పెళ్లి చేసుకునే ఆలోచన లేదని నటి కీర్తిసురేష్‌ స్పష్టం చేశారు. ‘మహానటి’తో భారీ విజయాన్ని అందుకున్న ఈ అమ్మడు ఈ మధ్య ‘సామి స్క్వేర్‌’ వంటి పలు చిత్రాల్లో నటించి ప్రేక్షకులను ఆకట్టుకుంది. అలాగే విజయ్‌కి జోడీగా ‘సర్కార్‌’లో కనిపించి మెప్పించింది. అగ్ర నాయికల్లో ఒకరిగా మారిన ఆమె చేతినిండా చిత్రాలతో బిజీగా ఉంది. ఈ సందర్భంగా ఆమె తన చిత్ర విశేషాలను పంచుకున్నారు. ‘నేను సినిమా హీరోయిన్‌ అవుతానని ఒక్క రోజు కూడా అనుకోలేదు. చదువు పూర్తయ్యాక మోడలింగ్‌ చేశా. అప్పుడు ఓ మలయాళ చిత్రంలో నటించే అవకాశం వచ్చింది. నటించాలా..? వద్దా..? అని చాలాసార్లు ఆలోచించా. కొందరి సలహా మేరకు నటించా. ఆ సినిమా మంచి గుర్తింపును తెచ్చిపెట్టింది.

ఆ వెంటనే తమిళంలో చాలా అవకాశాలు వచ్చాయి. తమిళంలో కూడా నటించడానికి సంబంధించి చాలాసార్లు ఆలోచించా. తమిళ పరిశ్రమ మంచి ఆధరణతో పాటు చక్కని గుర్తింపును కూడా ఇచ్చింది. ఇప్పుడు మంచి అవకాశాలు వస్తున్నాయి. తమిళంలో చాలా మంది ప్రతిభావంతులైన యువ దర్శకులు వస్తున్నారు. వారి చిత్రాలన్నీ చాలా భిన్నంగా ఉన్నా యి. నేను కూడా ఎక్కువ శ్రమించినందునే ఈ స్థాయికి వచ్చానని అనుకుంటున్నా. ఇంకా మంచి గుర్తింపు తెచ్చుకోవాల్సిన ఆవశ్యకత ఉంది. ప్రస్తుతం చాలా సినిమాల్లో నటిస్తూ బిజీగా ఉన్నా. అందువల్ల ఇప్పుడే పెళ్లి గురించి ఆలోచించడం లేదు. వాస్తవం చెప్పాలంటే ఇప్పుడు పెళ్లి చేసుకునే ఆలోచనే లేదు. ఇంకా మంచి పాత్రలు పోషించాలి. అద్భుతమైన చిత్రాల్లో నటించాలనుంది. ఆ కలలన్నీ నెరవేరాక పెళ్లి గురించి ఆలోచిస్తానని’ చెప్పారు.