ఆస్కార్ బరిలో సినిమాలు ఇవి
cinema | Suryaa Desk | Published : Thu, Jan 24, 2019, 02:41 AM
91వ ఆస్కార్ వేడుక ఫిబ్రవరి 24న లాస్ ఏంజెలిస్లో అంగరంగ వైభవంగా జరగనుంది. ఈ వేడుకకు హోస్ట్గా ఆఫ్రికన్ అమెరికన్ నటుడు కెవిన్ హార్ట్ వ్యవహరించనున్నారు. మరి ఈ ఏడాది ఆస్కార్ అవార్డులు పొందే చిత్రాలు, నటీనటులు, దర్శకులు, టెక్నీషియన్లు ఎవరనే విషయంలో ఉత్కంఠ నెలకొంది. ఏయే చిత్రాలు బరిలో నిలుచున్నాయనే సస్పెన్స్కు తెరపడింది. మంగళవారం ఆస్కార్ అకాడమీ నామినేషన్ల తుది జాబితాను ప్రకటించింది. ఈసారి ఆస్కార్ పురస్కారాలకు ఓ ప్రత్యేకత వుందని చెప్పాలి. ఎందుకంటే ఇంతవరకు థియేటర్లలో విడుదలైన చిత్రాలకే పురస్కారాలు అందించారు. ఈసారి డిజిటల్ ప్లాట్ఫామ్లో విడుదలైన ఓ చిత్రం కూడా బరిలో నిలిచింది. అదే నెట్ఫ్లిక్స్ చిత్రం ‘రోమా’. ఇక అత్యధిక నామినేషన్లు పొందిన చిత్రాలుగా ‘ది ఫేవరెట్’, ‘రోమా’ నిలిచాయి. వాటికి ఉత్తమ చిత్రం సహా చెరో పది నామినేషన్లు దక్కాయి.
ఆ తర్వాత స్థానాల్లో ఎనిమిది నామినేషన్లతో ‘ఏ స్టార్ ఈజ్ బోర్న్’, ‘వైస్’, ఏడు నామినేషన్లతో ‘బ్లాక్ పాంథర్’ నిలిచాయి. ఆస్కార్ ఉత్తమ చిత్రం విభాగంలో నామినేషన్ అందుకున్న తొలి సూపర్ హీరో చిత్రంగా ప్రత్యేకత చాటుకుంది. ఉత్తమ నటుడి పురస్కారం కోసం విలియం డఫో, క్రిస్టియన్ బాలె, విగ్గొ మార్టెన్సెన్, బ్రాడ్లీ కూపర్, రమీ మలెక్ పోటీలో వున్నారు. ఉత్తమ నటిగా ఒలివియా కొల్మన్, యలిట్జా అపరిసియొ, మెలిస్కా మెక్ కెర్తీ, గ్లెన్ క్లోజ్, లేడీ గాగా పోటీలో నిలిచారు
|
|