F2 మన చేతుల్లోకి రాబోతుంది

కొత్త ఏడాదిలో ఐదు వారాలు గడిచిపోయాయి. ఈ ఐదు వారాల్లో టాలీవుడ్‌కు దక్కిన ఏకైక విజయం ‘ఎఫ్-2‘. ఐతే హిట్ ఒకటే కానీ.. అది మామూలు హిట్టు కాదు. ఇలాంటి మీడియం రేంజ్ బడ్జెట్ మూవీకి ఏకంగా రూ.80 కోట్ల షేర్ అంటే మాటలు కాదు. అన్ని రకాల ఆదాయాలు కలిపితే పెట్టుబడి మీద మూడు రెట్లకు పైనే వసూలు చేస్తోందీ చిత్రం. సంక్రాంతి రేసులో చివరగా వచ్చిన ‘ఎఫ్-2’ మిగతా సినిమాలన్నింటినీ వెనక్కి నెట్టి దూసుకెళ్లింది. విడుదలైన మూడు వారాల తర్వాత కూడా మంచి వసూళ్లు సాధిస్తూ సాగిపోతోంది.

ఐతే ఈ చిత్రం థియేటర్లలో బాగా ఆడుతుండగానే ఆన్ లైన్లో రిలీజ్ కాబోతుండటం విశేషం. అమేజాన్ ప్రైమ్‌లో ఈ నెల 11 నుంచి ‘ఎఫ్-2’ను లైవ్ స్ట్రీమ్ చేయబోతున్నారు. ఈ విషయాన్ని అధికారికంగా ప్రకటించారు. సరిగ్గా విడుదలైన నెల రోజులకు ‘ఎఫ్-2’ అమేజాన్లోకి వచ్చేస్తోంది. ఇంకా మంచి వసూళ్లు సాధిస్తుండగానే ఆన్ లైన్లోకి వచ్చేయడం ఆశ్చర్యమే. కానీ ముందుగా చేసుకున్న ఒప్పందం ప్రకారం ఇలా రిలీజ్ చేసేస్తున్నారు. ఈ చిత్రానికి మరీ ఈ స్థాయి ఆదరణ, ఇంత లాంగ్ రన్ నిర్మాత దిల్ రాజు కూడా ఊహించలేదేమో. గత ఏడాది ‘రంగస్థలం’.. ‘96’ లాంటి చిత్రాల విషయంలోనూ ఇదే జరిగింది. అవి థియేటర్లలో బాగా ఆడుతుండగానే ఆన్ లైన్లోకి వచ్చేశాయి.

ఎఫ్-2 రిలీజయ్యాక విడుదలైన చెప్పుకోదగ్గ సినిమా ‘మిస్టర్ మజ్ను’ మాత్రమే. అది బాక్సాఫీస్ దగ్గర నిలవలేకపోయింది. దీనికి ముందు, వెనుక వారాల్లో అసలు సినిమాలే లేవు. దీంతో ఎఫ్-2 ఒక కొత్త సినిమా స్థాయిలో వసూళ్లు సాధిస్తోంది. ఈ వారం రాబోతున్న ‘యాత్ర‘ ప్రభావం కూడా దానిపై పెద్దగా ఉంటుందని భావించట్లేదు. కాబట్టి ఎఫ్-2 థియేటర్ల నుంచి ఇంకా కొంత ఆదాయం రాబట్టే అవకాశం ఉంది. ఇప్పటికే ఈ చిత్ర షేర్ రూ.80 కోట్ల మార్కుకు చేరువగా ఉంది.