వర్మకు లక్ష్మీ పార్వతి స్ట్రాంగ్ వార్నింగ్
cinema | Suryaa Desk | Published : Mon, Oct 30, 2017, 10:43 AM
'లక్ష్మీస్ ఎన్టీఆర్' పేరిట ఎన్టీఆర్ రియల్ స్టోరీ ఆధారంగా ఓ బయోపిక్ని తెరకెక్కించడానికి రెడీ అవుతున్న రాంగోపాల్ వర్మకు స్ట్రాంగ్ వార్నింగ్ ఇచ్చారు వైఎస్సార్సీపీ నేత లక్ష్మీ పార్వతి. స్వర్గీయ నందమూరి తారక రామారావు జీవిత చరిత్ర ఆధారంగా సినిమాను తెరకెక్కించి, ఆనాటి సంగతులని నేటి తరానికి చెప్పాలనుకున్న రాంగోపాల్ వర్మ ప్రయత్నాన్ని అభినందిస్తున్నాను. వర్మ తనని ఇంతవరకు కలవలేదు. తనని కలిసి చర్చిస్తే, ఎన్టీఆర్ జీవితంలోని మరిన్ని విశేషాలని ఆయనకి వివరిస్తా. వర్మ ఉన్నది ఉన్నట్టుగా చెబితే పర్వాలేదు కానీ అలా కాకుండా ఆ సినిమా ఏ మాత్రం తేడాగా వున్నా... వర్మ మళ్లీ పాత లక్ష్మీపార్వతిని చూడాల్సి వుంటుందని హెచ్చరించారు ఆమె. తనని ఎవరు, ఎలా విమర్శించినా.... వారికి తనదైన స్టైల్లో ఘాటుగా కౌంటర్ ఇచ్చే అలవాటున్న వర్మ ఈసారి లక్ష్మీ పార్వతికి ఎలాంటి రిప్లై ఇస్తారో మరి!
ప్రస్తుతం నాగార్జునతో ఓ సినిమా చేయడానికి రెడీ అవుతున్న వర్మ.. వచ్చే ఏడాది ఏప్రిల్లో నాగ్ సినిమాను రిలీజ్ చేసి ఆ తర్వాత లక్ష్మీస్ ఎన్టీఆర్ అనే సినిమాను సెట్స్పైకి తీసుకెళ్తానని ఇటీవలే ప్రకటించిన సంగతి తెలిసిందే. వచ్చే ఏడాది సెప్టెంబర్ నెలలోగా లక్ష్మీస్ ఎన్టీఆర్ సినిమా పూర్తయి ఆడియెన్స్ ముందుకు వస్తుందని వర్మ తన ప్రకటనలో పేర్కొన్నాడు.
|
|