నేడు కృష్ణాష్టమి సందర్భంగా.. అవ్రామ్‌ లుక్‌ విడుదల

మంచు కుటుంబం నుంచి మరో తరం తెరపై సందడి చేసేందుకు సిద్ధమైన సంగతి తెలిసిందే. కథానాయకుడు మంచు విష్ణు కుమారుడు అవ్రామ్‌ 'కన్నప్ప'లో  ఓ కీలకమైన పాత్రలో నటిస్తున్నట్లు గతంలోనే ప్రకటించారు.నేడు కృష్ణాష్టమి సందర్భంగా అవ్రామ్‌ లుక్‌ను విడుదల చేశారు. తిన్నడుగా నటించనున్నట్లు తెలిపారు. మంచువిష్ణు చిన్నప్పటి పాత్రను ఇందులో అవ్రామ్‌ పోషించనున్నాడు. ఈ పోస్టర్‌ను మోహన్‌ బాబు పోస్ట్‌ చేసి అందరికీ కృష్ణాష్టమి శుభాకాంక్షలు చెప్పారు. అవ్రామ్‌కు  ఇది తొలి సినిమా కావడంతో నెటిజన్లు విషెస్ చెబుతున్నారు.'కన్నప్ప' విషయానికొస్తే.. మంచు విష్ణు టైటిల్‌ పాత్రలో ముఖేశ్‌ కుమార్‌ సింగ్‌ దర్శకత్వంలో రానున్న పాన్‌ ఇండియా చిత్రమిది. మోహన్‌బాబు నిర్మిస్తున్నారు. ప్రీతి ముకుందన్‌ కథానాయిక. ప్రభాస్, అక్షయ్‌ కుమార్, శరత్‌కుమార్, మోహన్‌లాల్‌ తదితరులు ముఖ్య పాత్రలు పోషిస్తున్నారు. దీని షూటింగ్‌ దాదాపుగా పూర్తయింది. ఇటీవల దీని టీజర్‌ను విడుదల చేయగా మంచి ప్రేక్షకాదరణను సొంతం చేసుకుంది. తన పాత్రలో విష్ణు పరిచయమైన తీరు.. యుద్ధ ఘట్టాల్లో ఆయన చేసిన సాహసాలు.. ఆఖర్లో అతిథి పాత్రల్లో ప్రభాస్, అక్షయ్‌కుమార్‌లు తళుక్కుమనడం.. సినిమాపై అంచనాలు రెట్టింపు చేశాయి.

ఓ సందర్భంగా హీరో మంచు విష్ణు దీనిగురించి మాట్లాడుతూ.. ''ఇది నా కలల సినిమా. నా బిడ్డతో సమానం. ఒక నటుడిగా ఈ చిత్రం నాకు గౌరవాన్ని పెంచుతుంది. కెరీర్‌ పరంగా నా జీవితాన్ని మార్చేస్తుంది. ఇందులో చాలామంది అగ్ర నటీనటులు ఉన్నారు. వాళ్లందరితో కలిసి నటించడం నాకు దక్కిన అదృష్టంగా భావిస్తున్నా. భక్తుడు కాక ముందు కన్నప్ప ఎలా ఉండేవారో అలా నటించడం సవాల్‌గా అనిపించింది. మంచి చిత్రం చేయాలనే లక్ష్యంతో బడ్జెట్‌ విషయంలో రాజీ పడకుండా దీన్ని నిర్మించాం' అని చెప్పారు.