రీ రిలీజ్ కి 'ఖడ్గం'
cinema | Suryaa Desk | Published : Mon, Oct 07, 2024, 07:40 PM
ప్రస్తుతం ఇండస్ట్రీలో రీ రిలీజ్‌‌ల సందడి కొనసాగుతోంది. గత రెండు నెలల్లోనూ మహేష్ బాబు 'మురారి', పవన్ కళ్యాణ్ 'గబ్బర్ సింగ్' సినిమాలు కలెక్షన్ల జల్లు కురిపించాయి. ఈ నేపథ్యంలోనే కృష్ణ వంశీ సెన్సేషనల్ మూవీ 'ఖడ్గం' రీ రిలీజ్ చేసేందుకు చిత్ర యూనిట్ సన్నాహాలు చేసింది. వాస్తవానికి ఈ సినిమాని గత నెలలోనే రిలీజ్ చేయాల్సి ఉండగా కొన్ని అనివార్య కారణాల చేత ఈ నెల 18కి వాయిదా పడింది. ఈ సందర్భంగా చిత్ర యూనిట్ మీడియా సమావేశం నిర్వహించారు. ఈ ఈ మీటింగ్‌లో హీరో శ్రీకాంత్ మాట్లాడుతూ.. 'మొదట్లో ఈ సినిమా ప్రొడ్యూసర్ మధుమురళి గారు నన్ను ఈ సినిమాకి వద్దన్నారని, ఎవరైనా పెద్ద స్టార్ హీరో అయితే బెటర్ అని అన్నారు.
కానీ.. డైరెక్టర్ కృష్ణ వంశీ మాత్రం శ్రీకాంతే కరక్ట్ అని పట్టుబడటంతో ఈ సినిమా చేశానని' చెప్పుకొచ్చారు. అలాగే సినిమా రిలీజై ఇన్నేళ్ళైనా ఇప్పుడొస్తున్న చాలా దేశభక్తి చిత్రాల కంటే ఖడ్గం సినిమా చాలా మిన్న అని శ్రీకాంత్ అభిప్రాయపడ్డారు. 2002లో రిలీజైన ఈ సినిమా ఆగష్టు 15న, జనవరి 26న ఇప్పటికి ప్రతి ఇంట్లో ప్రసరమవుతుంది. ఈ సినిమాలో శ్రీకాంత్‌తో పాటు రవితేజ, ప్రకాష్ రాజ్, ఉత్తేజ్, బ్రహ్మజీ, సోనాలి బింద్రే మరియు సంగీత కీలక పాత్రల్లో నటించగా దేవిశ్రీ ప్రసాద్ సంగీతం అందించారు.
|
|