మెహరీన్‌కు నిరాశ..

స్టార్‌ హీరోల సరసన నటించాలన్న తన కోరిక ఇంకా నెరవేరకపోవడం మెహరీన్‌లో ఒకింత నిరాశ అలుముకునేలా చేసింది. ఇప్పటివరకు టాలీవుడ్‌, బాలీవుడ్‌, కోలీవుడ్‌…ఇలా వివిధ భాషల చిత్రాల్లో నటించినప్పటికీ ఆమెకు మాత్రం పెద్ద హీరోల చిత్రాల్లో అవకాశాలు రాలేదు. మంచి హిట్లు వచ్చినా ఆనందించడానికి తప్ప తనను స్టార్‌ హీరోయిన్‌గా మార్చలేకపోయాయని ఆమె వాపోతోందట. తెలుగులో కృష్ణగాడి వీర ప్రేమగాథ వంటి హిట్‌ చిత్రం ద్వారా పరిచయమైన ఆమెకు కొన్ని అపజయాలు కూడా ఎదురయ్యాయి. అయినప్పటికీ మహానుభావుడు, తాజాగా వచ్చిన ఎఫ్‌-2 వంటి చిత్రాలు ఆమెకు మంచిపేరే తెచ్చిపెట్టాయి. ఎఫ్‌ 2 చిత్రం వంద కోట్లకు పైగా వసూలు చేసింది. దీని తర్వాత తనకు అవకాశాలు కొదవలేకపోయినప్పటికీ స్టార్‌ హీరోల చిత్రాలలో అవకాశాలు రాకపోవడం ఆశలపై నీళ్లు చల్లినట్లయిందని పరిశ్రమలో అంటున్నారు. ఇక తన మాతృభాష పంజాబీ బాషల చిత్రాల్లో ఇప్పుడిప్పుడే ఆమె నటించడం మొదలుపెట్టింది. ఎఫ్‌ 2 తర్వాత తెలుగులో ఒకటీ, రెండు చిత్రాలు మాత్రమే ఆమె చేతిలో ఉన్నాయి. మరోవైపు తమిళంలో ఆమె బాగా నిలదొక్కుకునే ప్రయత్నం చేస్తోంది. గతంలో విష్ణువిశాల్‌కు జంటగా సుశీంద్రన్‌ దర్శకత్వంలో ఆమె నటించిన నెంజిల్‌ తుణివిరుందాల్‌ చిత్రం అంతగా ఆడలేదు. ఆ తర్వాత కోలీవుడ్‌లో నటించిన నోటా చిత్రం కూడా అనుకున్నంతగా ప్రేక్షకులను ఆకట్టుకోలేదు. దాంతో ఇప్పుడామె నటిస్తున్న ముచ్చటగా మూడో చిత్రమైనా తనకు కోలీవుడ్‌లో విజయాన్ని అందించకపోతుందా! అని ఆమె ఎన్నో అంచనాలతో ఉంది.ధనుష్‌ సరసన తాజాగా ఆమె నటిస్తున్న ఈ చిత్రానికి పటాస్‌ అనే టైటిల్‌ను నిర్ణయించారు. దురై సెంథిల్‌కుమార్‌ దర్శకత్వం వహిస్తున్నారు. ఇందులో ధనుష్‌ సరసన స్నేహ, మెహరీన్‌ ఇద్దరూ నటిస్తున్నారు. మొత్తంమీద స్టార్‌ హీరోయిన్‌ హోదా తనకు తెలుగు సినీరంగంలో దక్కినా దాని ప్రభావం తప్పకుండా మిగిలిన భాషల సినీరంగాలపై ఉంటుందని…అందుకే హోదానే ఆమె లక్ష్యంగా చేసుకుందని అంటున్నారు.