![]() |
![]() |
by Suryaa Desk | Fri, Jul 12, 2024, 09:11 PM
"బతకండి బతకండి అంటే వినలేదు కదరా.. కోత మొదలైంది.. ఇక రాత రాసిన ఆ భగవంతుడు వచ్చినా ఆపలేడు.." అంటూ దమ్ము సినిమాలో జూనియర్ ఎన్టీఆర్ డైలాగ్ గుర్తొస్తోంది.. ప్రస్తుతం హైదరాబాద్ ట్రాఫిక్ పోలీసుల దూకుడు చూస్తుంటే. మద్యం సేవించి వాహనాలు నడపకండి బాబూ.. అని బుజ్జగిస్తూ, హెచ్చరిస్తూ.. రకరకాల పద్ధతుల్లో చెప్తూనే ఉన్నారు మన పోలీసులు. కానీ.. మన మందుబాబులు వింటే కదా. పీకల దాకా తాగి.. వాహనాలతో రోడ్డెక్కుతున్నారు. ఫలితంగా ప్రమాదాలకు కారణమవుతున్నారు. దీంతో.. తాగి వాహనాలు నడుపుతున్న వారిపై హైదరాబాద్ ట్రాఫిక్ పోలీసులు.. ప్రత్యేక దృష్టి సారించారు.
హైదరాబాద్ ట్రాఫిక్ పోలీసులు నిర్వహించిన స్పెషల్ డ్రంక్ అండ్ డ్రైవ్లో విస్తుపోయేలా మందుబాబులు అడ్డంగా బుక్కయ్యారు. కేవలం పది రోజులు నిర్వహించిన డ్రంక్ అండ్ డ్రైవ్ తనిఖీల్లో ఏకంగా 16 వందల మంది మందుబాబులు పోలీసులకు దొరికిపోయారు. జూలై 1నుంచి జూలై 10 వరకు హైదరాబాద్ నగరవ్యాప్తంగా నిర్వహించిన డ్రంక్ అండ్ డ్రైవ్ తనిఖీల్లో తాగి వాహనాలు నడుపుతున్న 1,614 మందిపై పోలీసులు కేసులు నమోదు చేశారు.
డ్రంక్ అండ్ డ్రైవ్ కేసుల్లో వివిధ కోర్టుల్లో మొత్తం 992 ఛార్జ్ షీట్లు దాఖలు చేశారంటే.. నగరవాసులు ఎంతలా తాగి ఊగుతూ బండ్లు నడుపుతున్నారో అర్థమవుతోంది. అంతేకాదు.. వీరిలో 55 మందికి 15 రోజుల జైలు శిక్ష పడింది. ఎనిమిది మంది డ్రైవింగ్ లైసెన్సులు రద్దు చేశారు. అంతేకాదు.. తాగి వాహనాలు నడిపిన మందుబాబుల నుంచి ఏకంగా 21 లక్షల 36 వేల రూపాయల జరిమానాలు వసూలు చేశారు పోలీసులు.
డ్రంక్ అండ్ డ్రైవ్ తనిఖీల్లో పట్టుబడిన వారంతా ఎక్కువగా ద్విచక్రవాహనదారులే ఉండటం గమనార్హం. ద్విచక్రవాహనాలు నడుపుతూ.. డ్రంక్ అండ్ డ్రైవ్ తనిఖీల్లో మొత్తంగా.. 1346 మంది పోలీసులకు అడ్డంగా దొరికిపోయారు. వీరందరికి గోషామహల్, బేగంపేట టీటీల వద్ద కౌన్సెలింగ్ సెషన్ కూడా నడిచింది. అయితే.. వీళ్లలో ఎవరైనా మళ్లీ డ్రంక్ అండ్ డ్రైవ్లో పట్టుబడితే మాత్రం.. డ్రైవింగ్ లైసెన్సులు శాశ్వతంగా రద్దు చేస్తామని పోలీసులు హెచ్చరించారు.
ఇప్పటికే.. హైదరాబాద్ వ్యాప్తంగా పోలీసులు ట్రాఫిక్ నిబంధనలను కఠినతరం చేశారు. రోడ్డు ప్రమాదాలకు కారణం ముఖ్యంగా.. రాంగ్ రూట్లో వాహనాలు నడవటంతో పాటు మద్యం సేవించి నడపటం కూడా ప్రధాన కారణంగా పోలీసులు గుర్తించారు. దీంతో.. ట్రాఫిక్ నిబంధనలు ఉల్లంఘించే వారిపై పోలీసులు మరింత కఠినంగా వ్యవహరించాలని నిర్ణయించుకున్నారు. ఈ క్రమంలోనే.. రాంగ్ రూట్లో వెళ్లేవారితో పాటు మిగతా ట్రాఫిక్ రూల్స్ పాటించని వారి నుంచి భారీగా జరిమానాలు వసూలు చేయటమే కాకుండా.. కేసులు కూడా నమోదు చేస్తున్నారు పోలీసులు.