![]() |
![]() |
by Suryaa Desk | Mon, Aug 12, 2024, 07:32 PM
అమెరికా పర్యటన పూర్తి చేసుకున్న సీఎం రేవంత్ రెడ్డి బృందం.. అటు నుంచి నేరుగా దక్షిణ కొరియాకు చేరుకుని.. పెట్టుబడుల వేట కొనసాగిస్తోంది. ఈ క్రమంలోనే.. వరంగల్లోని కాకతీయ మెగా టెక్స్టైల్ పార్కులో పెట్టుబడులు పెట్టేందుకు కొరియన్ కంపెనీలు ఆసక్తి వ్యక్తం చేశాయి. సీఎం రేవంత్ రెడ్డి పిలుపుతో ఈమేరకు కొరియా టెక్స్టైల్ ఫెడరేషన్ సానుకూలంగా స్పందించింది.
దక్షిణ కొరియా పర్యటనలో భాగంగా తెలంగాణ సీఎం రేవంత్ రెడ్డి.. పలు గ్లోబల్ కంపెనీల అధినేతలు, బిజినెస్ గ్రూపులతో సమావేశాలు, చర్చలు జరుపుతున్నారు. ఈక్రమంలోనే కొరియా ఫెడరేషన్ ఆఫ్ టెక్స్టైల్ ఇండస్ట్రీ ఆధ్వర్యంలో జరిగిన బిజినెస్ రౌండ్ టేబుల్ సమావేశంలో సీఎం రేవంత్ రెడ్డి ప్రసంగించారు. టెక్స్టైల్ రంగం విస్తృత్తికి తెలంగాణ ప్రభుత్వం తీసుకున్న కార్యాచరణ స్థానిక కంపెనీలతో పాటు ప్రపంచ స్థాయి కంపెనీలకు కూడా అనుకూలంగా ఉందని సీఎం తెలిపారు. వరంగల్ మెగా టెక్స్టైల్ పార్కులో పెట్టుబడులకు సంబంధించిన అవకాశాలను సీఎం రేవంత్ రెడ్డి వివరించారు.
యంగాన్ కార్పొరేషన్ ఛైర్మన్ కియాక్ సంగ్, కొరియా ఫెడరేషన్ ఆఫ్ టెక్స్టైల్ ఇండస్ట్రీ ఎగ్జిక్యూటివ్ వైస్ ఛైర్మన్ సొయంగ్ జూ సహా 25 అగ్రశ్రేణి టెక్స్టైల్ కంపెనీల అధినేతలు ఈ బిజినెస్ రౌండ్ టేబుల్ సమావేశంలో పాల్గొన్నారు. సీఎం రేవంత్ రెడ్డి వెంట పరిశ్రమలు ఐటీ శాఖ మంత్రి దుద్దిళ్ల శ్రీధర్ బాబు, ఉన్నతాధికారులు కూడా సమావేశంలో పాల్గొన్నారు.
దక్షిణ కొరియాలో సీఎం రేవంత్ రెడ్డి పర్యటన శుభారంభంగా ప్రారంభమైంది. కొరియాలోని అతిపెద్ద పారిశ్రామిక వ్యవస్థల్లో ఒకటైన ఎల్ఎస్ గ్రూప్ ఛైర్మన్ కు-జాఉన్ తో సీఎం రేవంత్ రెడ్డి భేటీ అయ్యారు. ప్రపంచ ప్రఖ్యాత ఎల్జీ గ్రూప్ వ్యవస్థాపకులైన ల్జీ గ్రూప్ కుటుంబాన్ని కలవడంతోనే కొరియా పర్యటన ప్రారంభం కావడం పట్ల సీఎం రేవంత్ హర్షం వ్యక్తం చేశారు.
ఎలక్ట్రిక్ కేబుల్స్, బ్యాటరీల తయారీ, గ్యాస్, ఎనర్జీ తదితర రంగాల్లో తెలంగాణలో పెట్టుబడుల విస్తరణకు ఎల్ఎస్ గ్రూప్ ఆసక్తి కనబర్చింది. ముఖ్యమంత్రి గారి ఆహ్వానం మేరకు ఎల్ఎస్ గ్రూప్ (LS Group) ఉన్నత స్థాయి బృందం త్వరలోనే తెలంగాణను సందర్శించనుంది.
ఇప్పటికే.. అమెరికాలో సాగిన రేవంత్ రెడ్డి పర్యటన ఫలప్రదంగా ముగిసిన విషయం తెలిసిందే. సుమారు 19 కంపెనీలు తెలంగాణ ప్రభుత్వంతో కలిసి పని చేసేందుకు అవగాహన ఒప్పందాలు చేసుకున్నాయి. ఫలితంగా రాష్ట్రానికి 31,532 కోట్ల పెట్టుబడులతో పాటు 30,750 కొత్త ఉద్యోగాలు రానున్నాయి.