![]() |
![]() |
by Suryaa Desk | Mon, Aug 12, 2024, 08:15 PM
సైబర్ కేటుగాళ్లు రెచ్చిపోతున్నారు. రోజుకో తరహా మోసంతో అమాయకులకు వల వేస్తున్నారు. ఇప్పటి వరకు ఖరీదైన కానుకలు, ఈ కేవైసీలు, లాటరీలతో మోసాలకు పాల్పడిన కేటుగాళ్లు ఇప్పుడు బెదిరింపులకు దిగుతున్నారు. డ్రగ్స్ పార్సిల్ పేరట బెందిరింపులకు పాల్పడి డబ్బులు వసూలు చేస్తున్నారు. తాజాగా.. ఆదిలాబాద్ జిల్లా భైంసాలో ఓ తండ్రికి ఫోన్ చేసిన సైబర్ కేటుగాళ్లు మీ అమ్మాయి తప్పుడు పని చేసిందని బెదిరించారు. మేం చెప్పినట్లు చేయకపోతే అరెస్ట్ చేస్తామని హెచ్చరించారు. ఆందోళనకు గురైన సదరు వ్యక్తి తేరుకునే ఆరా తీయగా.. అది ఫేక్ కాల్ అని తేలింది.
వివరాల్లోకి వెళితే.. ఆదిలాబాద్ జిల్లా భైంసా మండలం ఇలేగాంకు చెందిన కాంబ్లే వెంకటేశ్ ఫోన్కు రెండ్రోజుల క్రితం ఓ ఫోన్ కాల్ వచ్చింది. వెంకటేష్ కాల్ లిఫ్ట్ చేసిన వెంటనే.. 'మేం పోలీసులు మాట్లాడుతున్నాం.. భైంసాలోని గురుకులంలో చదువుతున్న మీ అమ్మాయి డ్రగ్స్ అమ్ముతుంది. కాలేజీలో ఇవాళ మేం రైడ్ చేసి పట్టుకున్నాం. వెంటనే మేం చెప్పిన చోటుకి మీరు రావాలి. లేకుంటే నీ కూతురును అరెస్ట్ చేయటమే కాదు తుపాకీతో కాల్చేస్తాం' అని సైబర్ కేటుగాళ్లు బెదిరించారు. ఆందోళనలో ఉన్న వెంకటేష్ అవతలి వ్యక్తుల్ని ప్రశ్నించేలోగానే.. మళ్లీ కాల్ చేస్తామని కట్ చేశారు.
తన కూతురు గురించి వారు చెప్పింది విని షాక్కు గురైన వెంకటేష్ వెంటనే తేరుకొని.. గురుకులం ప్రిన్సిపల్కు కాల్ చేశారు. అదంతా అబద్ధమని.. డ్రగ్స్ వంటివి తమ క్యాంపస్లో ఉండవని ప్రిన్సిపల్ వెంకటేష్తో చెప్పటంతో అతడు ఊపిరి పీల్చుకున్నాడు. తనకు ఫోన్ చేసింది సైబర్ కేటుగాళ్లని.. ఫేక్ కాల్ అని నిర్ధారించుకున్నాడు. కాగా, ఇటీవల కాలంలో ఇటువంటి బెదిరింపు కాల్స్ ఎక్కువగా వస్తున్నాయని పోలీసులు చెప్పారు. అప్రమత్తంగా ఉండాలని.. ఇటువంటి కాల్స్ వస్తే టెన్షన్కు గురి కాకుండా వెంటనే పోలీసులకు సమాచారం అందించాలన్నారు. ఇంటర్నేషనల్ నెంబర్స్ వచ్చే కాల్స్, కానుకలు, ఫ్రీ రీఛార్జ్లు అంటూ వచ్చే లింక్లను కూడా ఓపెన్ చేయవద్దని పోలీసులు సూచిస్తున్నారు.