![]() |
![]() |
by Suryaa Desk | Mon, Aug 12, 2024, 08:20 PM
టెక్నాలజీ ఎంత అభివృద్ధి చెందినా ఇస్త్రీ రంగంలో పెద్దగా ఆవిష్కరణలు మాత్రం జరగలేదు. గతంలో బొగ్గున మండించి ఇస్త్రీ పెట్టే వేడెక్కిన తర్వాత.. ఇస్త్రీ చేసేవారు. ఇలా చేయటానికి చాలా సమయం పట్టేది. ఇస్త్రీ పెట్టే వేడెక్కాలంటే కనీసం గంట నుంచి రెండు గంటల సమయం పట్టేది. ఆ తర్వాత కరెంట్తో నడిచే ఐరన్ బాక్స్లు అందుబాటులోకి వచ్చాయి. అయితే ఇవి చాలా ఖర్చుతో కూడుకున్నవి. కరెంట్ ద్వారా వినియోగించే ఐరన్ బాక్స్ల ద్వారా విద్యుత్ బిల్లులు ఎక్కువగా వస్తాయి. దానికి తోడు విద్యుత్ కోతలు. దీంతో ఇస్త్రీ డబ్బాలు పెట్టుకుని జీవించే సాధారణ కార్మికులు తీవ్రంగా నష్టపోతున్నారు. ఒక్కో రోజూ కూలీ కూడా గిట్టుబాటు కావటం లేదు.
అయితే ఇస్త్రీ కార్మికులు ఎదుర్కొంటున్న సమస్యలకు తాజాగా పరిష్కారం దొరికింది. ఎల్పీజీతో నడిచే గ్యాస్ ఆధారిత ఐరన్ బాక్సులు అందుబాటులోకి వస్తున్నాయి. హైదరాబాద్ రోటరీ క్లబ్ ఆధ్వర్యంలో ఇప్పటికే పలువురు కార్మికులకు ఎల్పీజీ ఇస్త్రీ పెట్టెలను అందజేశారు. ఈ ఇస్త్రీ పెట్టేల ద్వారా కార్మికులకు సమయంతో పాటు ఖర్చు కూడా ఆదా అవుతుంది. కరెంట్ ఐరన్ బాక్స్తో ఒక ప్యాంట్ ఇస్త్రీ చేసేందుకు రూ. 3 వరకు ఖర్చవుతుంది. అదే బొగ్గుల బాక్స్ అయితే రూ.1.35 వరకు ఖర్చు అవుతుంది. అదే ఎల్పీజీ బాక్స్ అయితే కేవలం 55 పైసలు మాత్రమే అవుతుంది. మెుత్తంగా బొగ్గుల ఇస్త్రీ పెట్టెకు నెలకు రూ.2500 ఖర్చవుతుండగా.. ఎల్పీజీ ఐరన్ బాక్స్కు కేవలం రూ.800 మాత్రమే అవుతుంది.
ఈ బాక్స్ వినియోగంతో కార్మికుల ఆరోగ్యానికి కూడా ఎటువంటి హాని జరగదు. సాధారణంగా బొగ్గుల ఇస్త్రీ పెట్టే బరువు సుమారుగు 10 కేజీలకు పైనే ఉంటుంది. ఎల్పీజీ ఐరన్ బాక్స్ మాత్రం 6.5 కేజీలు ఉంటుంది. దీంతో దీన్ని వినియోగించటం చాలా సులువు. చేతి కండరాలు పట్టేయటం వంటి వండవు. విద్యుత్ ఇస్త్రీ పెట్టెలు అయితే కరెంట్ షాక్ వంటి భయాలు ఉంటాయి. ఎల్పీజీతో ఆ టెన్షన్ అక్కర్లేదు. ఇక బొగ్గుల బాక్స్ వినియోగంతో పొగ, దాన్నుంచి వచ్చే కార్బన్ వంటి ఉద్గారాలతో కార్మికుల ఆరోగ్యంపై తీవ్ర ప్రభావం పడేది. ఎల్పీజీ ఐరన్ బాక్స్ల వినియోగం ద్వారా ఆరోగ్యంపై ఎటువంటి దుష్ప్రచారం పడదు.
ఇక దీన్ని వినియోగించటం చాలా ఈజీ. వంట చేసుకునే సమయంలో గ్యాస్ స్టౌన్ అన్ చేసినట్లుగానే ఆన్ చేయాలి. ఎప్పుడు కావాలంటే అప్పుడు ఆన్ చేసుకోవచ్చు. ఆన్ చేసిన రెండు నిమిషాల్లోనే బాక్స్ వేడెక్కుతోంది. బాక్స్ నుంచి వచ్చే వేడిని మనకు కావాల్సిన విధంగా మార్చుకోవచ్చు.