![]() |
![]() |
by Suryaa Desk | Mon, Aug 12, 2024, 08:22 PM
ప్రస్తుతం అందరిది ఉరుకుల పరుగుల జీవితం. ఈ బిజీ లైఫ్లో సెల్ఫోన్ అనేది భాగమైపోయింది. సెల్ఫోన్ లేకుండా కొందరికి ఏ పనులు జరగవు. అయితే అదే సెల్ఫోన్ కారణంగా పలువురు నిర్లక్ష్యంగా వ్యవహరించి ప్రాణాలు కోల్పోతున్నారు. చిన్న చిన్న తప్పిదాలతో ఎంతో విలువైన ప్రాణాలు తీసుకుంటున్నారు. చాలా మందికి ఓ వైపు ఫోన్ మాట్లాడుతూ.. అదే సమయంలో మరో పని చేసే అలవాటు ఉంటుంది. సెల్ఫోన్ మాట్లాడుతూ.. డ్రైవింగ్ చేయటం, ఫోన్ మాట్లాడుతూనే ప్రమాదకరమైన కరెంట్ పనులు వంటివి చేస్తూ ఉంటారు. అలా చేసేవారికి ఇది వార్నింగ్ లాంటి వార్తే అని చెప్పుకొవచ్చు.
ఓ వైపు మొబైల్ ఫోన్ మాట్లాడుతున్న వ్యక్తి.. నిర్లక్ష్యంగా ఎలక్ట్రిక్ హీటర్ను చంకలో పెట్టుకోవడంతో కరెంట్ షాక్కు గురై స్పాట్లోనే ప్రాణాలు కోల్పోయాడు. ఈ ఘటన ఖమ్మం పట్టణంలో చోటు చేసుకుంది. పోలీసులు తెలిపిన వివరాల ప్రకారం.. పట్టణంలోని కాల్వ ఒడ్డునున్న హనుమాన్ గుడి సమీపంలో నివాసం ఉండే దోనెపూడి మహేష్ బాబు (40) స్థానికంగా కొబ్బరికాయల వ్యాపారం నిర్వహిస్తుండేవాడు. ఆదివారం (ఆగస్టు 11) రాత్రి 8 గంటల సమయంలో తన పెంపుడు కుక్కకు స్నానం చేయించేందుకు సిద్ధమయ్యాడు. వేడినీళ్ల కోసం ఎలక్ట్రిక్ హీటర్ ఆన్ చేయబోయారు. ఈలోగా ఫోన్ రావడంతో కాల్ లిప్ట్ చేసి మాట్లాడటం ప్రారంభించాడు.
ఫోన్ మాట్లాడే ధ్యాసలో ఉన్న మహేష్ బాబు నిర్లక్ష్యంగా హీటర్ను నీటి బకెట్లో బదులు చంకలో పెట్టుకుని స్విచ్ ఆన్ చేశాడు. అంతే అతడు ఒక్కసారిగా కరెంట్ షాక్కు గురయ్యాడు. దగ్గర్లోనే ఉన్న మహేష్ బాబు తొమ్మిదేళ్ల కుమార్తె శభన్య తండ్రి అకస్మాత్తుగా కిందపడిపోవటంతో భయంతో కేకలు వేసింది. కూతురి కేకలు విని ఆందోళనకు గురై బయటకు వచ్చిన మహేష్ భార్య దుర్గాదేవి, స్థానికులు అతడిని దగ్గర్లోని ఓ ప్రైవేటు ఆసుపత్రికి తరలించారు. కానీ అప్పటికే ఆయన మృతి చెందినట్లు డాక్టర్లు తెలిపారు. కాగా, మహేష్ మృతి ఘటనపై కేసు నమోదు చేసుకున్న పోలీసులు విచారణ చేపట్టారు. సెల్ఫోన్ మాట్లాడేటప్పుడు పరధ్యానం మంచిది కాదని.. అది మన ప్రాణాలకే ముప్పు తీసుకొస్తుందని పోలీసులు తెలిపారు. ఫోన్ మాట్లాడే సమయంలో జాగ్రత్తగా ఉండాలని.. ఆ సమయంలో మరో పని చేయకపోవటమే ఉత్తమమని అంటున్నారు.