కూతురుకు బతికుండగానే చావు ఫ్లెక్సీ కొట్టించిన తల్లిదండ్రులు.. ఎంత గుండెకోత

కడుపులో పిండం ఏర్పడిన నాటి నుంచే వారిని కంటికి రెప్పలా కాపాడుకుంటారు తల్లిదండ్రులు. వారి బంగారు భవిష్యత్తు గురించి ఎన్నెన్నో కలలు కంటారు. బాగా చదివించి ఉన్నత స్థానంలో ఉంచాలనుకుంటారు. తాము కష్టపడైనా.. పిల్లలకు ఉన్నతమైన జీవితాన్ని అందించాలని అనుకుంటారు. అందరిలాగే ఆ తల్లిదండ్రులు కూడా కలలు కన్నారు. కూతురును బాగా చదివించి.. ఉన్నత స్థానంలో చూడాలనుకున్నారు.

కానీ కూతురు మాత్రం ఓ అబ్బాయిని ప్రేమించింది. అదే విషయాన్ని తల్లిదండ్రులకు చెప్పింది. తల్లిదండ్రులకు వారి పెళ్లి నిర్ణయం నచ్చలేదు. వద్దని వారించారు. అయినా వినని కూతురు.. అతడితో వెళ్లిపోయి ప్రేమ పెళ్లి చేసుకుంది. దీంతో తల్లిదండ్రులు తీవ్ర మనోవేదనకు గురయ్యారు. తమను కాదని ఇంట్లోంచి వెళ్లిపోయిన కూతురు.. బతికున్నా చనిపోయినట్లేనని భావించారు. ఈక్రమంలోనే ఆమె చావు ఫ్లెక్సీ కొట్టించారు. అందుకు సంబంధించిన వీడియో సోషల్ మీడియాలో వైరల్‌గా మారింది.

వివరాల్లోకి వెళితే.. రాజన్న సిరిసిల్ల జిల్లా సిరిసిల్ల పట్టణానికి చెందిన చిలువేరి మురళి కూతురు చిలువేరి అనూష్ణ స్థానికంగా బీటెక్ ఫస్ట్ ఇయర్ చదువుతోంది. కాలేజీలో రోజుల్లోనే ఓ అబ్బాయిని ప్రేమించింది. ఇదే విషయాన్ని తల్లిదండ్రులకు చెప్పింది. ఇప్పుడే పెళ్లి వద్దని.. బాగా చదివి ఉన్నత స్థాయికి రావాలని కూతురుకు సూచించారు. పెళ్లికి ఒప్పుకోలేదు. దీంతో తాను ప్రేమించిన అబ్బాయితో ఓ గుడిలో పెళ్లి చేసుకుంది అనూష్ణ. తమకు ఇష్టంలేని పెళ్లి చేసుకుందని అనూష్ణ తల్లిదండ్రులు తీవ్ర మనోవేదనకు గురయ్యారు. బతికుండానే ఆమెకు చావు ఫ్లెక్సీ కొట్టించాడు. జననం.. మరణం తేదీలతో ఆశ్రునివాళి అంటూ ఫ్లెక్సీ ఫ్రింట్ చేయించి ఇంటి ముందు ఉంచాడు.

'నా బిడ్డ పోయింది. నా బిడ్డను దొంగలు మోసం చేసిన్రు. నా అమ్మాయిని ట్రాప్ చేసి మోసం చేసిన్రు. నా చుట్టే ఉండి నా కళ్లు పొడిచేటట్లు చేసిన్రు. నా బిడ్డను మంచి కాలేజీలో బీటెక్ చేర్పించా. అయ్యా.. మీ పిల్లలకు అన్యాయం చేసుకోకండ్రి. బిడ్డలారా.. తల్లిదండ్రులకు అన్యాయం చేయకండి. మీ కాళ్లు మెుక్కుతా.. దండం పెడతా' అంటా ఆ తండ్రి ఆవేదనకు గురయ్యాడు. ఆ తండ్రి ఆవేదన తీరును చూసి స్థానికులు కంటతడి పెట్టుకున్నారు. ఏ తండ్రికి ఇటువంటి గుండెకోత రాకూడని కన్నీళ్లు పెట్టుకున్నారు.