ఇంటర్వ్యూకి వెళ్లిన యువతిపై ఘోరం.. జాబ్‌కు సెలెక్ట్ చేసి, ఆపై డోర్ లాక్ చేసిన మేనేజర్

కష్టపడి చదువుకుని.. ఉద్యోగం చేసి కుటుంబానికి అండగా ఉండాలని ఎన్నో ఆశలతో ఎక్కడెక్కడి నుంచో హైదరాబాద్‌కు వస్తే.. వారి అవసరాన్ని ఆసరాగా చేసుకుని అడ్వాంటేజ్ తీసుకుంటున్నారు కొందరు కామాంధులు. ఇదేదో సినిమాల్లోనో, డాక్యుమెంటరీలో ముందుగా వచ్చే వాయిస్ ఓవర్ కాదు.. అచ్చంగా హైదరాబాద్‌లో జరిగిన యదార్థ సంఘటన. ఉద్యోగం కోసం ఇంటర్వ్యూకి వచ్చిన ఓ యువతిని సెలెక్ట్ అయ్యావని చెప్పి.. ఆ తర్వాతి రోజు ఇంటికి వచ్చి సిమ్ కలెక్ట్ చేసుకోవాలని చెప్పి అఘాయిత్యానికి పాల్పడ్డాడు ఓ సాఫ్ట్‌వేర్ కంపెనీ మేనేజర్.

హైదరాబాద్ మధురానగర్‌లో ఉన్న టెక్ ఫ్లో అనే సాఫ్ట్‌వేర్ సంస్థలో జాబ్ కోసం ఓ యువతి అప్లికేషన్ పెట్టుకుంది. కొద్ది రోజులకు సదరు యువతికి ఇంటర్వ్యూ కాల్ వచ్చింది. దీంతో ఆ అమ్మాయి.. మధురానగర్‌లోని ఆ కంపెనీకి ఇంటర్వ్యూ కోసం వెళ్లింది. ఇంటర్వ్యూ ప్రాసెస్ మొత్తం పూర్తయింది. మేనేజర్ రౌండ్ కూడా పూర్తి కాగా.. ఆ కంపెనీ మేనేజర్ అయిన నవీన్ కుమార్.. ఆ అమ్మాయికి మీరు ఈ జాబ్‌కు సెలెక్ట్ అయ్యారు కంగ్రాట్స్ అని కూడా చెప్పాడు. మీరు వెంటనే జాయిన్ కావొచ్చు అని కూడా చెప్పాడు.

ఆ మాటలతో.. అమ్మాయి ఆనందానికి అవధుల్లేవు. మనసు నిండా సంతోషం నిండిపోయింది. ఎగిరి గంతేయ్యాలన్నంతా ఆనందంగా ఉన్నా.. అది ఆఫీసు కాబట్టి కంట్రోల్ చేసుకుంది. అప్పుడే.. ఆ మేనేజర్ ఓ మెలిక పెట్టాడు. జాబ్‌లో జాయిన్ కావాలంటే ఆఫీస్ సిమ్‌కార్డ్ కచ్చితంగా ఉండాలని చెప్పాడు. ఉద్యోగం వచ్చిందన్న ఆనందంలో ఉన్న ఆ యువతికి మేనేజర్‌ చెప్పే మాటలపై ఎలాంటి అనుమానం రాలేదు. ఆయన చెప్పేది నిజమేనేమో అనుకుంది. అక్కడి వరకు కూడా అంతాబాగానే ఉండటంతో.. మేనేజర్ తన ఎత్తుగడ వేశాడు.

 అయితే.. ఆ సిమ్ కార్డు ఇవ్వాలంటే.. తాను ప్రస్తుతం బిజీగా ఉన్నానని, సిమ్‌కార్డు కలెక్ట్ చేసుకునేందుకు నేరుగా తన ఇంటికి రావాలని చెప్పాడు. ఆ మేనేజర్ మాయమాటలు నిజమేనని నమ్మిన ఆ అమ్మాయి.. ఆ మాటల వెనుక ఆ మేనేజర్ తప్పుడు భావనను అర్థం చేసుకోలేకపోయింది. సిమ్ కార్డు కోసం ఇంటికే ఎందుకు.. ఆఫీసులోనే ఇస్తారు కదా.. అని అడిగితే బాగుండదేమో అనుకుందో.. లేదా అలాగే తీసుకుంటారేమో అనుకుందో.. మేనేజర్ చెప్పినట్టు ఇంటికి వెళ్లింది.

అమ్మాయి ఇంటికి వచ్చిందంటే.. ఇక అన్నింటికీ సిద్ధమే అన్న నీచమైన నిర్ణయానికి వచ్చిన ఆ మేనేజర్.. ఆమె ఇంట్లోకి రాగానే డోర్ లాక్ చేసి యువతిపై అత్యాచారానికి ఎగబడ్డాడు. తాను ఏదో ఊహించుకుని వస్తే.. మేనేజర్ ఊహించని ప్రవర్తనకు షాక్ అయిన యువతి.. కేకలు వేసింది. అరిస్తే చంపుతానని ఆ మేనేజర్ బెదిరించినా భయపడకుండా.. అక్కడి నుంచి చాకచక్రంగా తప్పించుకున్న ఆ యువతి.. నేరుగా మధురానగర్ పోలీస్ స్టేషన్‌కి చేరుకుంది.

మేనేజర్ నవీన్ కుమార్ గురించి పోలీసులకు పూర్తిగా చెప్పుకొచ్చింది. యువతి ఇచ్చిన ఫిర్యాదు మేరకు కేసు నమోదు చేసుకున్న పోలీసులు నిందితుడిని అరెస్టు చేశారు. ఇలా.. ఉద్యోగం కోసం ఎదురుచూసే యువతను ముఖ్యంగా అమ్మాయిలను.. వారి అవసరాన్ని ఆసరాగా చేసుకుని లొంగదీసుకోవాలని ప్రయత్నిస్తుంటారని.. ఇలాంటి వారి పట్ల జాగ్రత్తగా ఉండాలని పోలీసులు సూచిస్తున్నారు.