వైజాగ్‌కు గోవా సరుకు.. 2 కోట్ల పైమాటే.. రెడ్ హ్యాండెండ్‌గా పట్టుకున్న తెలంగాణ పోలీసులు

తెలుగు రాష్ట్రాల్లో ఎన్నికలు కీలక ఘట్టానికి చేరుకున్నాయి. నేటి సాయంత్రంతో ప్రచార పర్వం ముగియటంతో.. రాజకీయ నేతల ప్రలోభాల పర్వానికి తెర తీయనున్నారు. దీంతో.. పోలీసులు భద్రత కట్టుదిట్టం చేశారు. మరోవైపు.. ప్రలోభాల పర్వానికి కావాల్సిన సరంజామా మొత్తాన్ని రాజకీయ నేతలు సిద్ధం చేసుకున్నట్టు తెలుస్తోంది. ఓటర్లను ప్రసన్నం చేసుకునేందుకు.. గోవా సరుకును సరఫరా చేస్తున్నట్టు తెలుస్తోంది. ఇప్పటికే ఆయా ప్రాంతాలకు డబ్బు సంచులు, మద్యం సీసాలు తరలించగా.. ఆలస్యంగా తరలిస్తున్న సరుకును పోలీసులు ఎక్కడికక్కడా స్వాధీనం చేసుకుంటున్నారు. ఈ నేపథ్యంలోనే.. గోవా నుంచి ఏపీలోని విశాఖపట్నానికి తరలిస్తున్న మద్యాన్ని తెలంగాణ పోలీసులు రెడ్ హ్యాండెడ్‌గా పట్టేసుకున్నారు.

గోవా నుంచి అక్రమంగా తరలిస్తున్న నాన్‌ డ్యూటి పెయిడ్‌ మద్యాన్ని తెలంగాణ ఎకైజ్‌ ఎన్‌ఫోర్స్‌మెంట్‌, పోలీసులు పట్టుకున్నారు. ఎన్నికల సందర్భంగా వాహనాల తనిఖీల్లో భాగంగా రూ.2.07 కోట్ల విలువ చేసే గోవా లిక్కర్‌ను సీజ్‌ చేశారు. జాతీయ రహదారి 44లో మహబూబ్‌నగర్‌ జిల్లా బాలనగర్‌ ఎక్స్‌ రోడ్‌ వద్ద 10వ తేదీ రాత్రి 11 గంటల సమయంలో వాహనాల తనిఖీల్లో భాగంగా ఏపీకి అక్రమంగా తరలిస్తున్న మద్యం వాహనాన్ని సీజ్ చేశారు.

అడ్డాకులకు చెందిన ఎస్‌ఐపీ శ్రీనివాస్‌ ఇచ్చిన సమాచారం మేరకు.. డీసీఎంలో అక్రమంగా తరలిస్తున్న మద్యాన్ని పట్టుకున్నారు. ఎక్సైజ్‌ ఎన్‌ఫోర్స్‌మెంట్‌ డైరెక్టర్‌ కమలాసన్‌ రెడ్డి అదేశాల మేరకు వచ్చిన పక్కా సమాచారంతో జడ్చర్లకు చెందిన ఎక్సైజ్‌ సీఐ, బాలనాగర్‌ ఎస్సై సిబ్బంది కలిసి వాహనాన్ని పోలీసుల సహకారంతో పట్టుకున్నారు. గోవాకు చెందిన జి. జాకప్‌తో పాటు హెల్పర్‌ను అదుపులోకి తీసుకుని మద్యం తరలిస్తున్న డీసీఎం వ్యాన్‌ను సీజ్ చేశారు.

ఈ మద్యం గోవా నుంచి విశాఖపట్నం తరలిస్తున్నట్టు నిందితులు తెలిపారు. 48 బాక్స్‌ల్లో ఉన్న మొత్తం 2000 (1200+800) బాటిళ్లు.. మొత్తంగా 17,280 లీటర్ల రాయల్‌ బ్లూ, రాయల్‌ క్విన్‌ బ్రాండ్లకు చెందిన మద్యాన్ని స్వాధీనం చేసుకున్నారు. ఈ మద్యం విలువ అక్షరాలా.. 2 కోట్ల 7 లక్షల 36 వేల విలువ ఉంటుందని అధికారులు తెలిపారు.