తొలిసారి ఓటేసిన హిమాన్షు.. తాతకు తగ్గ మనవడు.. ఎంత హుందాగా మాట్లాడాడో

తెలంగాణ వ్యాప్తంగా లోక్ సభ ఎన్నికల్లోని కీలక ఘట్టమైన పోలింగ్ ప్రక్రియ ప్రశాంతంగా జరిగింది. ఈ ఎన్నికల్లో రాష్ట్రంలోని 17 లోక్ సభ సెగ్మెంట్లలోని పోలింగ్ బూతుల్లో ఓటర్లు తమ ఓటు హక్కును వినియోగించుకున్నారు. ఈ క్రమంలోనే.. ప్రముఖ రాజకీయ, సినీ ప్రముఖులు కూడా తమ ఓటు హక్కును వినియోగించుకున్నారు. సీఎం రేవంత్ రెడ్డి తమ సొంతూరైన కొడంగల్‌లో ఓటేయగా.. ఆయనతో పాటు తన సతీమణి, కూతురు నైమిషా రెడ్డి కూడా ఓటు హక్కును వినియోగించుకున్నారు. కాగా.. మాజీ సీఎం, బీఆర్ఎస్ అధినేత కేసీఆర్ కూడా సిద్దిపేట జిల్లా చింతమడకలో ఓటేశారు. ఇక బీఆర్ఎస్ వర్కింగ్ ప్రెసిడెంట్ కేటీఆర్.. తన కుటుంబంతో కలిసి హైదరాబాద్ బంజారాహిల్స్‌లో ఓటు వేశారు. కేటీఆర్‌తో పాటు ఆయన సతీమణి శైలిమ, ఆయన కుమారుడు హిమాన్షు కూడా ఓటుహక్కు వినియోగించుకున్నారు.

కేసీఆర్ మనువడు హిమాన్షు.. తొలిసారి తన ఓటు హక్కును వినియోగించుకున్నారు. హైదరాబాద్ నందినగర్లోని జీహెచ్ఎంసీ కమ్యూనిటీ హాల్లో తన తండ్రి కేటీఆర్‌తో కలిసి ఓటు వేశారు. అయితే.. ఓటు వేసిన తర్వాత మీడియాతో మాట్లాడిన హిమాన్షు.. చాలా హుందాగా మాట్లాడారు. మొదటి సారి ఓటు వేసినందుకు తనకు తెలియని సంతృప్తి కలుగుతోందని.. తన వైపు నుంచి సామాజిక బాధ్యత తను కచ్చితంగా నిర్వర్తించాలని అనిపించిందని.. అందుకే ఓటు వేశానని హిమాన్షు తెలిపారు. భారత దేశ రాజ్యంగం కల్పించిన అరుదైన అవకాశాన్ని వినియోగించుకున్నందుకు గర్వంగా ఫీలవుతున్నట్టు హిమాన్షు చెప్పుకొచ్చారు.

ఇదే సమయంలో.. రాజకీయానికి సంబంధించి, పార్టీలకు సంబంధించిన ప్రశ్నలు అడుగుతుంటే.. ఈ సందర్భంలో అలాంటి ప్రశ్నలు వద్దంటూ సున్నితంగా తిరస్కరించారు హిమాన్షు. ఉన్నత విద్య కోసం అమెరికా వెళ్లిన హిమాన్షు... అక్కడి నుంచి తిరిగి వచ్చి లోక్ సభ ఎన్నికల పోలింగ్‌లో తొలిసారి తన ఓటు హక్కును వినియోగించున్నారు. కాగా.. హిమాన్షు మాట్లాడిన తీరు చూసిన చాలా మంది.. చాలా మెచ్యూర్డ్‌గా మాట్లాడుతున్నాడని.. తాతకు, తండ్రి వారసత్వాన్ని కొనసాగించే నాయకత్వ లక్షణాలున్నట్టుగా అభివర్ణిస్తున్నారు.