రేవంత్ రెడ్డిని కలిసిన బీజేపీ ఎమ్మెల్యేలు,,,తెలంగాణ పాలిటిక్స్‌లో ఇంట్రెస్టింగ్ సీన్

తెలంగాణలో రాజకీయాలు రోజు రోజుకు ఆసక్తికరంగా మారుతున్నాయి. కాంగ్రెస్ పార్టీ అధికారంలోకి వచ్చినప్పటి నుంచి.. పూర్తిగా రాజకీయ సమీకరణామాలు మారిపోతున్నాయి. ఈ క్రమంలోనే.. మరో ఆసక్తికర సన్నివేశం చోటుచేసుకుంది. లోక్ సభ ఎన్నికల నేపథ్యంలో నిన్నమొన్నటివరకు తీవ్ర స్థాయిలో విమర్శలు చేసిన బీజేపీ ఎమ్మెల్యేలు.. ఈరోజు స్వయంగా వెళ్లి సీఎం రేవంత్ రెడ్డిని కలిశారు. బీజేపీ ఎల్పీ నేత, నిర్మల్ ఎమ్మెల్యే మహేశ్వర్ రెడ్డి, ఎమ్మెల్యేలు రాకేష్ రెడ్డి, రామ్‌రావ్ పటేల్.. సీఎం రేవంత్ రెడ్డిని మర్యాదపూర్వకంగా కలిశారు. శనివారం రోజున రాష్ట్ర సచివాలయంలో భేటీ అయ్యారు.

రాష్ట్రంలో ధాన్యం కొనుగోళ్లను వేగవంతం చేయాలని, కొనుగోలు కేంద్రాల్లో రైతుల సమస్యలు వెంటనే పరిష్కరించాలని బీజేపీ ఎమ్మెల్యేలు సీఎం రేవంత్ రెడ్డిని కోరారు. అసెంబ్లీ ఎన్నికల్లో హామీ ఇచ్చినట్లుగా వరికి క్వింటాలుకు రూ.500 బోనస్ చెల్లించాలని కోరారు. ఈ మేరకు విజ్ఞప్తి లేఖను అందించారు.

అయితే.. లోక్ సభ ఎన్నికల తర్వాత తెలంగాణలో రేవంత్ రెడ్డి సర్కార్ కూలిపోతుందంటూ.. బీజేపీ అగ్రనేతలు సంచలన కామెంట్లు చేస్తుండగా.. మరోవైపు ఆ పార్టీకి చెందిన ఎమ్మెల్యేలు రేవంత్ రెడ్డితో భేటీ కావడం ఇప్పుడు సర్వత్రా చర్చనీయాంశంగా మారింది. అయితే.. ఈ భేటీపై బీజేపీ నేతలు క్లారిటీ ఇచ్చారు. కేవలం నియోజకవర్గాలు, రాష్ట్రంలో నెలకొన్న సమస్యలు పరిష్కారం చేయాలని కోరడానికే తమ ఎమ్మెల్యేలు సీఎంతో భేటీ అయ్యారని.. అందులో ఎలాంటి సందేహం లేదని స్పష్టం చేస్తున్నారు.

ఇదిలా ఉంటే.. గతంలోనూ బీఆర్ఎస్ పార్టీకి చెందిన నేతలు కూడా సీఎం రేవంత్ రెడ్డిని కలిశారు. అయితే.. రేవంత్ రెడ్డిని కలిసిన ప్రతిఒక్కరూ నియోజకవర్గాల అభివృద్ధి, సమస్యలను సీఎం దృష్టికి తీసుకెళ్లేందుకే కలిశామంటూ చెప్పుకొచ్చారు. కానీ.. అందులో చాలా మంది పార్టీలో చేరిపోయారు. కాగా.. ఇప్పుడు కూడా బీజేపీ ఎమ్మెల్యేలు కలవటం వాళ్లు కూడా అదే మాట చెప్తుండటం ఇప్పుడు పలు అనుమానాలకు తావిస్తోందంటూ ప్రజల్లో చర్చ జరుగుతోంది.