పొద్దుపొద్దున్నే ఇదేం పని.. నడిరోడ్డుపై అందరూ చూస్తుండగానే సిగ్గులేకుండా

సాధారణంగా.. వేకువజామున ఆరింటి సమయంలో చాలా మంది టీనో, కాఫీనో తాగుతారు. అదే సాయంత్రం ఆరు దాటిందంటే చాలా మంది మందుబాటిళ్లు ఓపెన్ చేస్తుంటారు. మరికొంత మంది దావత్ ఉంటేనో, తాగాలనిపించో.. మధ్యాహ్నమే మొదలు పెట్టేస్తారు. ఇంకొందరు మాత్రం ఎప్పుడెప్పుడు వైన్ షాపులు తీస్తారా అని దుకాణాల ముందు ఉదయం 10 గంటల నుంచి పడిగాపులు కాస్తుంటారు. అదేంటో.. ఈ యువతీయువకుల జంట మాత్రం పొద్దుపొద్దున్నే మొదలుపెట్టేశారు. వేకువజామున వాకింగ్‌కు చేసే సమయంలోనే.. చిల్డ్ బీర్లతో చిల్ అయ్యారు.

ఎవరికి ఎప్పుడు తాగాలనిపిస్తే అప్పుడు తాగుతారు అందులో మీకేంటీ నొప్పి అంటారు కావొచ్చు... అక్కడే ఉంది అసలు ముచ్చట. వాళ్లు తాగింది.. వాళ్ల ఇంట్లోనో.. బార్‌లోనో కాదు. ఎంచక్కా రోడ్డు మీదే కానిచ్చేస్తున్నారు. వాకింగ్ చేస్తున్నవాళ్లు, వాహనదారులు అందరూ చూస్తున్నా.. ఏమాత్రం సిగ్గుపడకుండా ఓ చేత్తో బీర్ బాటిల్.. మరో చేత్తో సిగరెట్ పట్టుకుని.. దర్జాగా తాగుతూ చిల్ అవుతున్నారు. ఇందేంటని ప్రశ్నించినందుకు.. వాకర్లతో గొడవకు దిగారు. వాళ్లు చేస్తున్న రచ్చను వీడియో తీస్తున్నందుకు బూతులు తిడుతూ హల్చల్ చేసింది యువతి.

ఈ ఘటన జరిగింది ఎక్కడో కాదు.. హైదరాబాద్- నాగోల్ పరిధిలోని ఫతుల్లాగూడ సమీపంలోని రోడ్డుపై. వేకువజామున.. ఓ కారులో యువతీ, యువకుడు వచ్చారు. కారును రోడ్డు పక్కనే నిలిపి ఉంచి.. వారు బీర్లు, సిగరెట్లు తాగటం ప్రారంభించారు. అదే సమయంలో చాలా మంది మార్నింగ్ వాకింగ్ చేస్తున్నా.. పట్టించుకోకుండా వాళ్ల పని వాళ్లు కానిచ్చారు. మార్నింగ్ వాకింగ్ చేసేవాళ్లలో మహిళలు, చిన్నపిల్లలు కూడా ఉండటం గమనార్హం.

 చాలాసేపటికి కూడా వాళ్లు అక్కడి నుంచి వెళ్లకపోగా.. కారులో పాటలు పెట్టుకుని హంగామా మొదలుపెట్టటంతో.. కొంత మంది యువకులు పట్టలేక.. వారిని అక్కడి నుంచి వెళ్లిపోవాలని సూచించారు. అలా చెప్పినందుకు.. ఆ యువతి గొడవకు దిగింది. దీంతో.. ఆ యువతి చేస్తున్న రచ్చను వాకర్స్ వీడియో తీస్తుండటంతో.. కోపంతో ఊగిపోయి హల్చల్ చేసింది యువతి. వీడియో తీయటం ఆపాలని.. లేకపోతే బాగుండదంటూ ధమ్కీ ఇస్తూ రెచ్చిపోయింది.

అక్కడికి వచ్చిన ఓ సీనియర్ సిటిజన్ సైతం వారికి నచ్చజెప్పే ప్రయత్నం చేసినా కూడా తాగిన మైకంలో రివర్స్‌లో మాట్లాడుతూ గొడవను పెద్దదిగా చేసుకున్నారు. "మా పాటికి మేము తాగుతున్నాం.. మిమ్మల్ని ఏమైనా డిస్టర్బ్ చేశామా.. మీరెప్పుడు తాగి తందనాలు ఆడలేదా.. మీ వయసుకు సిగ్గుండాలి.. మీ పిల్లల వీడియోలు కూడా తీస్తే ఇలాగే అంటారా.." అంటూ వితండవాదం చేస్తూ రెచ్చిపోయింది యువతి.

దీంతో.. జనాలు ఎక్కువగా గుమిగూడి గట్టిగా వారించటంతో.. అక్కడి నుంచి జంట ఉడాయించారు. ఈ తతంగమంతా ఓ వ్యక్తి వీడియో తీసి.. సోషల్ మీడియాలో పెట్టది.. ఇది కాస్త ఇప్పుడు వైరల్‌గా మారింది. ఈ వీడియోపై నెటిజన్లు స్పందిస్తూ.. తీవ్ర స్థాయిలో మండిపడ్డారు. "ఇలాంటి వాళ్లను నేరుగా తీసుకెళ్లి బొక్కలో వేయాలి, ఫుల్లుగా తాగి రోడ్డు మీద రచ్చ చేస్తున్నారు. సిగ్గు శరం లేకుండా మళ్ల ఉల్టా మాట్లాడుతున్నారు." ఓ నెటిజన్ తన ఆగ్రహాన్ని కామెంట్ రూపంలో వ్యక్తం చేశాడు. ఈ ఘటనపై స్థానికులు ఫిర్యాదు చేయగా.. పోలీసులు కేసు నమోదు చేసుకుని దర్యాప్తు చేస్తున్నారు. మరి ఈ ఘటనపై మీ అభిప్రాయం ఏంటన్నది కామెంట్ల రూపంలో తెలియజేయండి.