బస్సు మధ్యలో ఆపేసి మరీ..ఆర్టీసీ కండక్టర్ పైత్యం.. స్కూల్ అమ్మాయిలతో బూతులు

తెలంగాణలో మహాలక్ష్మి పథకం కింద.. మహిళలందరికీ ఉచిత బస్సు ప్రయాణ సౌకర్యం కల్పించటమేమో కానీ.. ఏదో ఒక విధంగా టీజీఎస్ ఆర్టీసీ తరచూ వార్తల్లో నిలుస్తూనే ఉంది. సీట్ల కోసం మహిళల కొట్లాటలతో కొన్నిరోజులు.. ఆ తర్వాత బస్సుల్లోనే కుట్లు అల్లికలు, బీడీలు చేయటం, వెల్లుల్లిపాయల పొట్టు తీసుకోవటం, కూరగాయలు కట్ చేయటం, బ్రష్ చేసుకోవటం లాంటి పనులకు సంబంధించిన వైరల్ వీడియోలతో ఇంకొన్ని రోజులు.. ఈ ఫ్రీ బస్సు పథకం వార్తల్లో నిలిచింది. ఇవన్నీ కాకుండా.. ఆర్టీసీ సిబ్బందిపై ప్రయాణికులు దాడి చేసిన ఘటనలు కూడా చోటుచేసుకోగా.. అలాంటి వారిని వదిలే ప్రసక్తే లేదంటూ ఆర్టీసీ ఎండీ సజ్జనార్ తీవ్రస్థాయిలో వార్నింగ్ ఇచ్చిన విషయమూ తెలిసిందే.

ఇవన్నీ ఒక ఎత్తయితే.. ఈ మధ్య వెలుగు చూస్తున్న ఘటనలు మరో ఎత్తు. ఓవైపు.. బస్సులో ప్రయాణిస్తున్న గర్బిణీకి స్వయంగా పురుడుపోసి మానవత్వం చాటుకుంటున్న కండక్టర్లు ఉంటే.. రద్దీని సాకుగా చేసుకుని మహిళల పట్ల అసభ్యకరంగా ప్రవర్తిస్తున్న ప్రబుద్ధ కండక్టర్లు కూడా ఉండటం శోచనీయం. ఇలాంటి ఘటనలు మర్చిపోకముందే.. మరో ప్రబుద్దుని పైత్యం వెలుగులోకి వచ్చింది.

రంగారెడ్డి జిల్లా షాద్ నగర్ నుంచి కేశంపేట మండలంలోని సంగెం గ్రామానికి ఉదయం, సాయంత్రం వేళల్లో.. స్కూల్, కాలేజీ విద్యార్థుల కోసం ఆర్టీసీ స్పెషల్ బస్సు నడుపుతోంది. అయితే ఆ బస్సులో ఆయా గ్రామాల నుంచి విద్యార్థి, విద్యార్థినిలు చదువుకోవడానికి షాద్‌నగర్ ప్రాంతానికి వెళ్లి వస్తుంటారు. ఈ క్రమంలో.. ఆ బస్సులో కండక్టర్‌గా విధులు నిర్వహిస్తున్న రాములు.. విద్యార్థినుల పట్ల దుర్భాషలాడుతూ పైత్యం ప్రదర్శిస్తున్నాడు. ఆధార్‌లో ఫొటో అప్డేట్ లేకపోయినా, బ్యాగ్‌లో నుంచి ఆధార్ బయటకు తీయడంలో కొంచెం ఆలస్యమైనా ఈ కండక్టర్‌‌కు ఎక్కడలేని చిరాకు, కోపం, అసహనం లాంటి అన్ని కలిపి తన్నుకొచ్చేస్తున్నాయి. దీంతో.. బస్సులో ఎక్కిన అమ్మాయిలను బూతులు తిడుతూ తన కోపాన్ని తీర్చుకుంటున్నాడు.

చదువుకోడానికి వెళ్తున్నారా.. గాడిదలు కాయడానికి వెళ్తున్నారా.. మీ ఆధార్ కార్డు చిన్నగా ఉంది.. అంటూ తన అసహనాన్ని అమ్మాయిలపై ప్రదర్శిస్తున్నాడు. అంతేకాదు రాయటానికి వీలులేని కొన్ని అసభ్యపదాలతో తిడుతూ తన చిరాకును తీర్చుకుంటున్నాడు. అక్కడితో ఆగుతున్నాడా అంటే.. బస్సును మధ్యలోనే అపేసి దిగిపోవాలంటూ విద్యార్థులను బెదిరిస్తున్నాడు. ముందు ఉంటే పడిపోతారని వెనక్కి వెళ్లాలంటూ డ్రైవర్ చెప్తే.. మీరైనా మగవాళ్లా అంటూ వెనక నుంచి ముందుకు తరుముతున్నాడంటూ ఆ విద్యార్థినిలు తమ గోడు వెళ్లబోసుకుంటున్నారు. ఆ కండక్టర్ పైత్యాన్ని భరించలేక.. విద్యార్థినిలు.. ఆర్టీసీ డిపో మేనేజర్‌కు ఫిర్యాదు చేశారు.