తెలంగాణలో మరో మూడ్రోజులు వానలు.. ఈ జిల్లాల్లో నేడు భారీ వర్షాలు

తెలంంగాణను వర్షాలు వీడటం లేదు. గత కొన్ని రోజులుగా రాష్ట్రంలో వర్షాలు కురుస్తూనే ఉన్నాయి. దీంతో రాష్ట్రంలోని వాగులు, వంకలు పొంగి పొర్లుతున్నాయి. జలాశయాలు, ప్రాజెక్టులు నిండు కుండలా మారాయి. తాజాగా.. రాష్ట్రానికి మరోసారి రెయిన్ అలర్ట్ జారీ చేసింది హైదరాబాద్ వాతావరణ శాఖ. రాష్ట్రంలో మరో మూడ్రోజుల పాటు వర్షాలు కురుస్తాయని చెప్పింది. ఉత్తర కర్ణాటకను ఆనుకొని ఉన్న తెలంగాణ ప్రాంతంలో.. ఆవర్తనం విస్తరించి ఉందని వాతావరణశాఖ అధికారులు తెలిపారు. దీని ప్రభావంతో రాష్ట్రంలోని పలు జిల్లాల్లో ఓ మోస్తరు నుంచి భారీ వర్షాలకు ఛాన్స్ ఉందన్నారు.

 నేడు భూపాలపల్లి, ములుగు, భద్రాద్రి, మహబూబాబాద్‌, ఆదిలాబాద్‌, మంచిర్యాల, సిరిసిల్ల, కరీంనగర్‌, వరంగల్‌, హనుమకొండ, జనగాం జిల్లాల్లో భారీ వర్షాలు కురుస్తాయన్నారు. ఈ మేరకు ఆయా జిల్లాలకు అధికారులు ఎల్లో అలెర్ట్‌ జారీ చేశారు. వికారాబాద్‌, సంగారెడ్డి, మెదక్‌, కామారెడ్డి, మహబూబ్‌నగర్‌, సిద్దిపేట,యాదాద్రి, రంగారెడ్డి, హైదరాబాద్, నాగర్‌కర్నూల్‌ జిల్లాల్లో ఓ మోస్తరు వర్షాలకు ఛాన్స్ ఉందని చెప్పారు. భారీ వర్షాలకు తోడుగా గంటకు 30 నుంచి 40 కిలో మీటర్ల వేగంతో బలమైన ఈదురు గాలులు వీచే అవకాశం ఉందన్నారు. ఉరుములు, మెరుపులతో పాటు పిడుగులు పడే అవకాశం ఉందని.. జాగ్రత్తగా ఉండాలని ప్రజలకు హెచ్చరించారు. పొలం పనులకు వెళ్లేవారు జాగ్రత్తగా ఉండాలని.. చెట్ల కింద, బహిరంగ ప్రదేశాల్లో ఉండకూడదని చెబుతున్నారు.

ఇక హైదరాబాద్ నగరంలో గత రెండు మూడ్రోజులుగా భారీ వర్షాలు కురుస్తున్నాయి. ఆదివారం సాయంత్రం నగరంలోని పలు ప్రాంతాల్లో భారీ వర్షం కురిసింది. కోఠి, నాంపల్లి, సోమాజిగూడ, ఉప్పల్‌, తార్నాక, హయత్‌నగర్‌, ఎల్బీనగర్‌, దిల్‌సుఖ్‌నగర్‌, సికింద్రాబాద్‌ తదితర ప్రాంతాల్లో వర్షం కురిసింది. దీంతో పలుచోట్ల ట్రాఫిక్‌కు తీవ్ర అంతరాయం ఏర్పడింది. రహదారిపై వర్షపు నీరు నిలచిపోటవంతో చాదర్‌ఘాట్‌ నుంచి ఎల్బీనగర్‌వైపు రాకపోకలకు అంతరాయం ఏర్పడింది. వివిధ చోట్ల రహదారులపై నీరు నిలిచిపోవడంతో వాహనదారులు ఇబ్బందులు ఎదుర్కొన్నారు. హైదరాబాద్ నగరానికి నేడు కూడా వర్ష సూచన ఉండటంతో జాగ్రత్తగా ఉండాలని అధికారులు హెచ్చరిస్తున్నారు. అవసరం అయితేనే బయటకు రావాలని సూచిస్తున్నారు.