చెవి కత్తిరించని కుక్కలుంటే ఫిర్యాదు చేయండి

ఒకప్పుడు వీధి కుక్కలంటే ఆయా వీధులకు రక్షణగా ఉండేవి. ఎవరైనా గుర్తు తెలియని వ్యక్తులు వచ్చినా, రాత్రిపూట ఆగంతకులు చొరబడినా పసిగట్టి మొరుగుతూ స్థానిక ప్రజలను అప్రమత్తం చేసేవి. కానీ, ఇప్పుడు అవే కుక్కలు ప్రజల ప్రాణాలు తీస్తున్నాయి. ముఖ్యంగా పసి పిల్లలు, వృద్ధుల పట్ల క్రూరంగా ప్రవర్తిస్తూ మృత్యుమృగాలుగా మారాయి. వీధుల్లో ఒంటరిగా వెళ్లాలంటే భయపడాల్సిన పరిస్థితులు వచ్చాయి. రాష్ట్రమంతటా ప్రతిరోజూ ఏదో ఒకచోట వీధి కుక్కల దాడిలో ప్రజలు బలవుతూనే ఉన్నారు.

ఇటీవల పలువురు చిన్నారులతో పాటు ఓ వృద్దురాలిని కూడా వీధి కుక్కలు చంపేసాయి. ఆయా కేసులను తెలంగాణ హైకోర్టు సుమోటోగా స్వీకరించి విచారణ కూడా చేపట్టింది. రాష్ట్ర ప్రభుత్వానికి చురకలంటించి వీధి కుక్కులను కట్టడి చేయటంలో ఎటువంటి చర్యలు తీసుకున్నారో చెప్పాలని ఆదేశించింది. హైకోర్టు ఆదేశాలతో ప్రభుత్వంలో కదలిక వచ్చింది. ముఖ్యంగా హైదరాబాద్ జీహెచ్‌ఎంసీ అధికారులు కీలక నిర్ణయం తీసుకున్నారు.

వీధి కుక్కలను కంట్రోల్ చేసేందుకు గాను.. వాటికి సంతానం కలగకుండా శస్త్రచికిత్సలు చేస్తున్నారు. వీటిని గుర్తించేందుకు వీలుగా వీధి కుక్కల చెవిని 'V' ఆకారంలో కత్తిరిస్తున్నామని జీహెచ్‌ఎంసీ కమిషనర్‌ ఆమ్రపాలి వెల్లడించారు. చెవి కత్తిరించని కుక్కలకు బర్త్ కంట్రోల్ సర్జరీ జరలేదని.. అలాంటి కుక్కలు ఎవరికైనా కనిపిస్తే వెంటనే తమకు ఫిర్యాదు చేయాలన్నారు. 'మై జీహెచ్‌ఎంసీ' మొబైల్‌ యాప్‌ ద్వారా కమిషనర్ ఆమ్రపాలి కోరారు. ఈ మేరకు సంక్షిప్త సందేశాల రూపంలో గ్రేటర్‌ హైదరాబాద్ పరిధిలోని 20 లక్షల ఫోన్‌ నంబర్లకు మెసేజ్ పంపారు. యాప్‌లో ‘వెటర్నరీ గ్రీవెన్స్‌’ లింక్‌ను క్లిక్‌ చేసి ఆయా కుక్కల ఫొటోలు, ప్రాంతం వంటి వివరాలు అందించాలని కోరారు.

జీహెచ్‌ఎంసీ అధికారుల నిర్ణయం పట్ల నగర వాసులు హర్షం వ్యక్తం చేస్తున్నారు. వీధి కుక్కలకు బర్త్ కంట్రోల్ సర్జరీలు చేయటంతో పాటు నగరంలో అవి విచ్చలవిడిగా తిరగకుండా చర్యలు తీసుకోవాలని కోరుతున్నారు. ఇటీవల కాలంలో కుక్కల బెడత ఎక్కువైందని.. వాటిని నియంత్రించేందుకు మరిన్న ప్రత్యామ్నాయ మర్గాలను అన్వేషించాలని అంటున్నారు.