హైదరాబాద్‌లో విస్కీ ఐస్‌క్రీమ్.. ఆ టేస్ట్‌కు అలవాటుపడితే అంతే సంగతి

చాక్లెట్ రూపంలో గంజాయి సహా మత్తుపదార్థాలను విక్రయిస్తోన్న ముఠాలు.. ఇప్పడు ఐస్‌క్రీమ్ రూపంలో ఎవరికీ అనుమానం రాకుండా యువతను మత్తుకు అలవాటు చేస్తున్నారు. హైదరాబాద్ నగరంలో విస్కీ ఐస్‌క్రీమ్‌లు దందా వెలుగులోకి వచ్చింది. జూబ్లీహిల్స్‌లోని ఓ పార్లర్‌లో పోలీసులు తనిఖీలు నిర్వహించడంతో ఈ ఐస్‌క్రీమ్‌ల గుట్టురట్టయ్యింది. రోడ్డు నెంబరు 1 లో వన్‌ అండ్‌ ఫైవ్‌ పార్లర్‌లో ఎక్సైజ్‌ పోలీసులు సోదాలు నిర్వహించగా.. విస్కీ ఐస్‌క్రీమ్‌లు బయటపడ్డాయి. ఐస్‌క్రీమ్‌లో పేపర్ విస్కీ కలిపి అమ్ముతున్నట్టు గుర్తించారు.

ఈ దందాకు పాల్పడుతోన్న విస్కీ కలిసి అమ్ముతున్న ముఠాను పోలీసులు అరెస్ట్‌ చేశారు. వన్‌అండ్‌ ఫైవ్‌ పార్లర్ నిర్వాహకులు దయాకర్‌రెడ్డి, శోభన్‌లను అదుపులోకి తీసుకున్నారు. 60 గ్రాముల ఐస్క్రీమ్లో 100 మిల్లీలీటర్ల విస్కీని కలుపుతున్నట్టు గుర్తించారు. సోదాల సమయంలో 11.5 కేజీల విస్కీ ఐస్ క్రీమ్స్‌ను పోలీసులు స్వాధీనం చేస్తున్నారు. 1 అండ్ 5 అరికో కేఫ్ ఐస్ క్రీమ్ పార్లర్‌లో గుట్టుచప్పుడు కాకుండా ఈ అమ్మకాలు సాగిస్తున్నట్టు తనిఖీల్లో వెలుగులోకి వచ్చింది. టెస్ట్ బాగుండటంతో అది విస్కీ కలిపిన ఐస్‌క్రీమ్ అని తెలియక యువత, పిల్లలు దాని కోసం ఎగబడుతున్నారు.

కాగా, హైదరాబాద్‌లో డ్రగ్స్ కట్టడికి ప్రభుత్వం కట్టుదిట్టమైన చర్యలు చేపట్టడంతో ముఠాలు కొత్తదారులు వెదుకుతున్నాయి. ఇందులో భాగంగానే ఎవరికీ అనుమానం రాకుండా చాక్లెట్లు, ఐస్‌క్రీమ్‌ల రూపంలో ఇలా డ్రగ్స్‌ను సరఫరా చేస్తున్నాయి. పబ్‌లపై కూడా నిఘా పెరగడంతో పెడ్లర్లు ఉక్కిరిబిక్కిరవుతున్నారు.

గత నెలలో కిరాణాకొట్టులో గంజాయి చాక్లెట్లను విక్రయిస్తున్న వ్యక్తిని సైబరాబాద్‌ స్పెషల్‌ ఆపరేషన్‌ టీం (ఎస్‌ఓటీ) పోలీసులు అరెస్టు చేసిన విషయం తెలిసిందే. ఉత్తరప్రదేశ్‌లోని గోహ్నియాకి చెందిన పివేస్‌ అలియాస్‌ ప్రైవేష్‌ బతుకుదెరువు కోసం కొన్నేళ్ల కిందట హైదరాబాద్‌కు వచ్చి.. ఐడీపీఎల్‌ బాలానగర్‌లో నివాసం ఉంటున్నారు. పేట్‌ బషీరాబాద్‌ పోలీసు స్టేషన్‌ పరిధిలోని సుభా నగర్‌లో కిరాణా షాపు నడుతున్న అతడికి.. ఆశించిన మేర ఆదాయం లేకపోవడంతో గంజాయి విక్రయించాలని నిర్ణయించుకున్నాడు. దీతో యూపీ నుంచి అక్రమంగా గంజాయి చాక్లెట్లను నగరానికి తీసుకొచ్చి స్కూల్, కాలేజీ విద్యార్థులు, యువత, దినసరి కూలీలకు విక్రయిస్తున్నాడు.