నిమ్స్‌లో చిన్నారులకు ఫ్రీగా హార్ట్ సర్జరీలు

ఇటీవల కాలంలో చాలా మంది చిన్నారులు గుండె జబ్బుల బారిన పడుతున్నారు. చిన్న వయస్సులో గండె సంబంధిత వ్యాధులతో ఇబ్బందులు పడుతున్నారు. కొన్నిసార్లు ఈ సమస్యలు వారి ప్రాణాలను బలి తీసుకుంటున్నాయి. గుండె సంబంధిత రుగ్మతలు సకాలంలోనే గుర్తించిన వారికి సర్జరీలు చేయించటం తల్లిదండ్రులకు తలకు మించిన భారం అవుతోంది. సర్జరీలకు లక్షల్లో ఖర్చవుతుండటంతో పేద తల్లిదండ్రులు దిక్కుతోచని స్థితిలో ఆపన్నహస్తం కోసం ఎదురు చూస్తున్నారు.

ఈ నేపథ్యంలో గుండెం సబంధిత వ్యాధులతో బాధపడేవారికి హైదరాబాద్ నిమ్స్ ఆసుపత్రి శుభవార్త వినిపించింది. అటువంటి చిన్నారులకు రూపాయి ఖర్చు లేకుండా ఫ్రీగా హార్ట్ సర్జరీలు నిర్వహించనున్నట్లు నిమ్స్ డైరెక్టర్ నగరి బీరప్ప వెల్లడించారు. బ్రిటన్‌‌కు చెందిన డాక్టర్ల బృందం సహకారంతో ఈ సర్జరీలు చేయనున్నట్లు చెప్పారు. ప్రముఖ చిన్నపిల్లల వైద్య నిపుణుడు డాక్టర్ రమణ దన్నపనేని సారథ్యంలో 11 మంది వైద్యుల బృందం నిమ్స్‌కు రానున్నట్లు చెప్పారు.

హాస్పిటల్ కార్డియో థొరాసిక్‌ విభాగాధిపతి అమరేశ్వరరావు, ప్రొ.గోపాల్‌ డాక్టర్ల బృందాన్ని సమన్వయం చేసుకుంటూ ఈ సర్జరీలు చేస్తారని చెప్పారు. ఈ నెల 22 నుంచి 28వ తేదీ వరకు ఉచితంగా సర్జరీలు చేయనున్నట్లు నిమ్స్ డైరెక్టర్ వెల్లడించారు. తెలంగాణ రాష్ట్ర ప్రభుత్వం ఈ సర్జరీలకు సహకారం అందిస్తోందని అన్నారు. గుండె సంబంధిత సమస్యలున్న చిన్నారులుంటే నిమ్స్ ఆసుపత్రి కార్డియో థొరాసిక్‌ డాక్టర్లను సంప్రదించాలని డాక్టర్ బీరప్ప సూచించారు.

ప్రపంచవ్యాప్తంగా పుట్టే ప్రతి 1000 మందిలో 8-10 మంది పిల్లల్లో ఏదో ఒక రకమైన గుండె సంబంధిత వ్యాధులుంటాయని డాక్డర్లు తెలిపారు. ఇందులో అధికశాతం గర్భస్థ దశలో ఉన్నప్పుడే తల్లికి చేసే వివిధ రకాల స్కానింగ్ పరీక్షల వల్ల బయట పడతాయని అంటున్నారు. నవజాత శిశు మరణాలకు మూడో అతి పెద్ద కారణం పుట్టుకతో వచ్చే గుండె జబ్బులేనని చెబుతున్నారు.

పిండదశలో అవయవాలు ఏర్పడే క్రమంలో అనేక కారణాల వల్ల ఈ గుండె జబ్బులు వస్తాయని వైద్య నిపుణులు అంటున్నారు. ఇవి పెద్దవాళ్ల గుండె జబ్బులకు పూర్తిగా భిన్నమైనవిగా ఉంటాయని.. గుండె, సంబంధిత రక్తనాళాల పరిణామ క్రమంలో ఇబ్బందులు తలెత్తుతాయని చెప్పారు. మేనరిక వివాహాలు, తద్వారా జన్యు సంబంధిత సమస్యలు, క్రోమోజోమ్ సంబంధిత సిండ్రోమ్‌లు, కొన్ని రకాల మందులు గర్భిణులు వాడటం, పొగతాగటం, మద్యపానం చేసే తల్లులు, తల్లుల్లో తీవ్ర మానసిక ఒత్తిడి, అధిక వయస్సు, గర్భిణిగా ఉండగా మధుమేహం, గర్భం దాల్చిన తొలినాళ్లలో సోకే ఇన్ఫెక్షన్లు పిల్లల్లో గుండె జబ్బులకు కారణంగా వైద్య నిపుణులు అంటున్నారు.