రూ.500 గ్యాస్ సిలిండర్ సబ్సిడీ ఖాతాలో జమ కావటం లేదా..?

తెలంగాణ ప్రభుత్వం మహాలక్ష్మి పథకంలో భాగంగా రూ.500 గ్యాస్ సిలిండర్ ఇచ్చే కార్యక్రమాన్ని ప్రారంభించించిన సంగతి తెలిసిందే. మహిళా సాధికారతలో భాగంగా కట్టెల పొయ్యితో వారు ఇబ్బందులు పడకుండా రూ.500లకే గ్యాస్ సిలిండర్‌ను అందుబాటులోకి తెచ్చినట్లు ప్రభుత్వం ఇది వరకే ప్రకటించింది. ప్రజా పాలన కార్యక్రమంలో సబ్సిడీ సిలిండర్ కోసం దరఖాస్తు చేసుకున్న అర్హులకు ప్రస్తుతం ఈ పథకం కింద రూ. 500లకే గ్యాస్ సిలిండర్ అందిస్తున్నారు.

అయితే సిలిండర్ ఇంటికి తీసుకొస్తే.. వినియోగదారులు పాత ధరనే చెల్లించాల్సి ఉంటుంది. మహాలక్ష్మీ పథకం లబ్ధిదారులైనా పాత ధరనే చెల్లించాలి. సబ్సిడీ మొత్తాన్నిఆ తర్వాత ప్రభుత్వం ఆయా వినియోగదారుల బ్యాంకు ఖాతాల్లోకి బదిలీ చేస్తుంది. ఇందు కోసం నెల వారీగా ఆయిల్ మార్కెటింగ్ కంపెనీలకు రాష్ట్ర ప్రభుత్వం అడ్వాన్సుగా సబ్సిడీ మొత్తాన్ని చెల్లిస్తుంది. ఆయిల్ కంపెనీలు సిలిండర్ తీసుకున్న అర్హులైన వినియోగదారులకు డైరెక్టుగా వారి బ్యాంకు ఖాతాల్లో ఆ మెుత్తాన్ని జమ చేస్తాయి.

మహాలక్ష్మీ పథకం లబ్ధిదారులైనా కొందరి అకౌంట్లలో వెంటనే డబ్బులు జమ కావటం లేదు. దీంతో వారు ఆందోళనకు గురవుతున్నారు. సిలిండర్ తీసుకున్న తర్వాత డబ్బులు నాలుగు రోజుల్లో జమ కానట్లయితే 1967 లేదా 180042500333 నంబర్‌కు కాల్ చేసి పరిష్కరించుకోవచ్చునని అధికారులు చెబుతున్నారు. ఆ నెంబర్లకు కాల్ చేస్తే డబ్బులు ఆగిపోవటానికి గల కారణాలు చెప్పటంతో పాటు ఎప్పుడు పరిష్కారం అవుతాయో పూర్తి క్లారిటీగా చెబుతారని అధికారులు వెల్లడిస్తున్నారు.

ఇక ఈ పథకం కింద ఎంపికయ్యారంటూ లబ్ధిదారులకు ప్రభుత్వం ప్రత్యేకంగా ఓ లెటర్ పంపుతోంది. పథకానికి చాలా మంది దరఖాస్తు చేసుకోగా.. తొలిదశలో దాదాపుగా 40 లక్షల మందిని ఎంపిక చేసినట్లు తెలిసింది. ఆయా లబ్ధిదారుల ఎంపికకు సంబంధించిన పత్రాలను స్థానిక రేషన్ డీలర్ల వద్ద అందుబాటులో ఉంచుతోంది. వారి వద్దకు వెళ్లి వాటిని తీసుకోవాలని ప్రజలకు అధికారులు సూచించారు. ఈ ప్రక్రియ నిరంతరాయంగా కొనసాగుతుందని వారు చెబుతున్నారు. ఇంకా వర్తించకపోతే మండల కార్యాలయాల్లో అఫ్లికేషన్ పెట్టుకోవచ్చునని అంటున్నారు.