హైదరాబాద్ శివారులో గ్రీన్ ఫార్మా సిటీ.. హైకోర్టుకు ప్రభుత్వం కీలక నివేదిక

హైదరాబాద్ శివారు రంగారెడ్డి జిల్లా యాచారం మండల పరధిలో ఫార్మాసిటీ ఏర్పాటుకు గత ప్రభుత్వం గ్రీన్ సిగ్నల్ ఇచ్చిన సంగతి తెలిసిందే. దాదాపు 19 వేల ఎకరాల్లో ఫార్మాసిటీ కట్టనున్నట్లు అప్పటి ప్రభుత్వం వెల్లడించింది. ఆ తర్వాత భూసేకరణ కూడా చేపట్టారు. అయితే.. తాజాగా ప్రభుత్వం మారటంతో ఫార్మాసిటీ ఏర్పాటుపై నీలి నీడలు కమ్ముకున్నాయి. అసలు ఫార్మాసిటీ ఉంటుందా.. ఉండదా అనే అనుమానాలు తలెత్తుతున్నాయి. బీఆర్ఎస్ వర్కింగ్ ప్రెసిడెంట్ కేటీఆర్ కూడా ఫార్మాసిటీ ఉన్నట్లా.. లేనట్లా క్లారిటీ ఇవ్వాలని ప్రభుత్వాన్ని కోరారు.

ఇక పలువురు రైతులు, అక్కడ భూములు ఉన్నవారు.. ఫార్మాసిటీపై స్పష్టత ఇవ్వాలని హైకోర్టులో పిటిషన్లు దాఖలు చేశారు. ఫార్మాసిటీ లేదంటూ పలు పత్రికల్లో, మీడియాలో కథనాలు వచ్చాయని.. ఫార్మా సిటీ నిమిత్తం సేకరించిన అవార్డు నోటిఫికేషన్‌ను సింగిల్‌ జడ్జి రద్దు చేశారని.. అందువల్ల ఆ భూమిపై నిషేధిత ఉత్తర్వులు తొలగించేలా ప్రభుత్వాన్ని ఆదేశించాలని రంగారెడ్డి జిల్లాకు చెందిన సత్య కొండలరాయ చౌదరి అనే వ్యక్తి హైకోర్టులో పిటిషన్ దాఖలు చేశాడు. ధరణి పోర్టల్‌లో లావాదేవీలు నిర్వహించుకోవడానికి అనుమతించాలని పిటిషన్‌లో కోరాడు.

ఈ వ్యాజ్యంపై ఇప్పటికే వాదనలు పూర్తి కాగా.. హైకోర్టు ఆదేశాల మేరకు రెవెన్యూశాఖ ముఖ్యకార్యదర్శి శనివారం కౌంటర్ దాఖలు చేశాడు. ఫార్మా సిటీ రద్దు వార్తలు అవాస్తవం అని చెప్పారు. యాచారం మండలం మేడపల్లిలో ఫార్మాసిటీ కొనసాగుతుందని నివేదికలో పేర్కొన్నారు. మేడిపల్లిలో 'గ్రీన్‌ ఫార్మా సిటీ' ఏర్పాటుకు గతంలోనే 1700 ఎకరాలు సేకరించిచామని.. అందుకు భూసేకరణ చట్టం కింద సెక్షన్‌ 11(1) కింద ప్రాథమిక నోటిఫికేషన్‌ కూడా జారీ అయిందన్నారు. ఇందులోనే పిటిషనర్‌కు చెందిన 10 ఎకరాల భూమి ఉందని చెప్పారు.

ప్రస్తుతం భూసేకరణ ప్రాథమిక నోటిఫికేషన్‌ అమల్లోనే ఉందని అన్నారు. అందువల్ల పిటిషనర్‌ భూమిపై ధరణి పోర్టల్ ద్వారా లావాదేవీలు నిర్వహించలేరని న్యాయస్థానానికి వెల్లడించారు. భూసేకరణ నిమిత్తం రెండు పత్రికల్లో నోటిఫికేషన్‌ను కూడా ప్రచురించామని వెల్లడించారు. పత్రికా కథనాలు, వినికిడి వార్తలతో పిటిషనర్‌ న్యాయస్థానానికి వచ్చారని.. ధరణిలో లావాదేవీలకు అనుమతించాలన్న పిటిషన్‌ను కొట్టివేయాలని ప్రభుత్వం న్యాయస్థానాన్ని కోరింది.