నేడు భారీ వర్షాలకు ఛాన్స్ లేదు,,,కొన్ని చోట్ల మోస్తరు వర్షాలు

తెలంగాణలో గత వారం రోజలుగా వర్షాలు కురుస్తున్నాయి. రాష్ట్రవ్యాప్తంగా పలు జిల్లాల్లో వానలు పడుతున్నాయి బంగాళాఖాతంలో ఈనెల 24న ఏర్పడిన అల్పపీడనం కారణంగా తెలంగాణలో విస్తారంగా వర్షాలు కురుస్తున్నాయి. అయితే నేడు వాతావరణం ఎలా ఉంది..? రాష్ట్రంలో వర్షాలు కురుస్తాయా..? గాలి వేగం ఎంత అనే విషయాలపై హైదరాబాద్ వాతావరణ కేంద్రం అధికారులు కీలక అప్డేట్ ఇచ్చారు.

హైదరాబాద్ వాతావరణ శాఖ అధికారుల అంచనా ప్రకారం నేడు రాష్ట్రంలో పెద్దగా వర్షాలు కురిసే ఛాన్స్ లేదు. నైరుతి రుతుపవనాలు ఉత్తర భారత్ నుంచి తిరోగమించటం ప్రారంభించినట్లు చెప్పారు. ఈశాన్య రుతుపవనాలుగా పిలిచే ఈ పవనాలు ప్రస్తుతం మధ్యప్రదేశ్ దాకా వచ్చినట్లు చెప్పారు. అక్టోబర్‌లో రెండు తెలుగు రాష్ట్రాల్లోకి కూడా వస్తాయని.. ఆ తర్వాతే వర్షాలు కురుస్తాయని చెప్పారు. నేడు తెలంగాణలో మేఘాలు వస్తూ పోతూ ఉంటాయి. వర్షాలు మాత్రం పెద్దగా ఉండే ఛాన్స్ లేదు.

ఇక వాతావరణంలో గాలి వేగం కూడా తగ్గింది. తెలంగాణలో గంటకు 8 కిలోమీటర్లుగా గాలి వేగం ఉంది. అయితే తాజాగా మధ్య బంగాళాఖాతంలో మరో అల్పపీడనం ఏర్పడే ఛాన్స్ ఉందని వాతావరణ శాఖ అధికారులు తెలిపారు. అక్కడ ఇప్పుడిప్పుడే గాలులు ఆవర్తనాన్ని ఏర్పరుస్తున్నాయన్నారు. ఆదివారం (సెప్టెంబర్ 29) నాటికి ఈ అంశంపై స్పష్టత వస్తుందని చెప్పారు. అక్కడ అల్పపీడనం ఏర్పడకపోతే.. శ్రీలంకకి దక్షిణాన మరో అల్పపీడనం ఏర్పడే ఛాన్స్ ఉంటుందని అన్నారు.

నేటి ఉష్ణోగ్రతల విషయానికొస్తే.. తెలంగాణలో గరిష్ఠంగా 32 డిగ్రీల సెల్సియస్ ఉష్ణోగ్రత ఉంటుందని చెప్పారు. మేఘాలు వస్తూ పోతూ ఉన్నా.. ఎండ కూడా గట్టిగానే ఉంటుందని చెప్పారు. తెలంగాణలో తేమ శాతం యావరేజ్‌గా 53 శాతం ఉంటుందని చెప్పారు. మెుత్తంగా చూస్తే నేడు తెలంగాణలో భారీ వర్షాలు మాత్రం లేవని అన్నారు. వాతావరణం ఆహ్లాదకరంగా ఉంటుందని అన్నారు.

అయితే నేడు హైదరాబాద్ సహా కొన్ని జిల్లాల్లో మాత్రం జల్లులు పడే ఛాన్స్ ఉందని చెప్పారు. ఉదయం ఎండకాసినా.. సాయంత్రానికి వాతావరణం చల్లబడి జల్లులు పడే ఛాన్స్ ఉందన్నారు. పడిన చోట్ల ఉరుములు మెరుపులు ఉంటాయని.. కొన్ని ప్రాంతాల్లో పిడుగులు కూడా పడే ఛాన్స్ ఉందని ప్రజలు అప్రమత్తంగా ఉండాలని సూచించారు. ఈ మేరకు ప్రజలకు హెచ్చరికలు జారీ చేశారు.