దేవర సినిమా కోసం టీజీఎస్ ఆర్టీసీ స్పెషల్ ట్వీట్,,, పోస్టుకు నెటిజన్లు రకరకాల కామెంట్లు

యంగ్ టైగర్ ఎన్టీఆర్, జాన్వీ కపూర్ జంటగా కొరటాల శివ డైరెక్షన్‌లో వచ్చిన 'దేవర- పార్ట్ 1' మూవీ.. సెప్టెంబర్ 27న విడుదలై.. హిట్ టాక్‌తో దూసుకుపోతోంది. ఎన్టీఆర్ తన నట విశ్వరూపంతో ఊచకోత కోశారంటూ రివ్యూలు కూడా ఇచ్చేస్తుండటంతో.. థియేటర్లు ప్రేక్షకులతో నిండిపోతున్నాయి. దీంతో.. దేవర ప్రేక్షకులకు టీజీఎస్ ఆర్టీసీ కీలక ప్రకటన చేసింది. దేవర హిట్ టాక్‌తో దూసుకువెళ్తోందని ప్రస్తావించిన టీజీఎస్ ఆర్టీసీ.. సినిమా చూసేందుకు టీజీఎస్ ఆర్టీసీలో సౌకర్యవంతంగా, ఎలాంటి అవాంతరాలు లేకుండా సమీపంలోని థియేటర్లకు వెళ్లాలంటూ ట్విట్టర్‌లో పోస్ట్ చేసింది. అయితే.. టీజీఎస్ ఆర్టీసీ పెట్టిన పోస్టుకు నెటిజన్లు రకరకాల కామెంట్లు చేస్తున్నారు.

 అయితే.. ట్వీట్‌లో ఎంజాయ్ ఏ హాస్సెల్ ఫ్రీ ట్రిప్ టూ నియరెస్ట్ థియేటర్ అని పోస్ట్ చేయటంతో.. థియేటర్లకు ఫ్రీ బస్సులు పెట్టరనుకుని కొందరు నెటిజన్లు కామెంట్లు చేస్తున్నారు. "ఓరేయ్ మూవీస్‌కు ఫ్రీ బస్సు ఏంట్రా" అంటూ ఒక నెటిజన్ కామెంట్ చేయగా.. "ఈ ఫ్రీ రైడ్స్‌కు డబ్బులు ఎవరు కడతారు..?" అని మరో నెటిజన్ ప్రశ్నించగా.. "ధట్స్ గ్రేట్ ఫ్రీ బస్సు" అని మరొకరు.. కామెంట్ చేశారు. దేవర సినిమాకు వెళ్తున్నామని చెప్తే ఏమైనా డిస్కౌంట్ ఇస్తారా.. అంటూ ఇంకొక నెటిజన్ అడిగాడు. ఈ అవాంతరాలు లేని బస్సు సౌకర్యాలు సినిమాలకు కాదు.. హాస్పిటల్స్‌కు, ఆఫీసులకు వెళ్లే వారికి ఇవ్వాలంటూ మరో నెటిజన్ ఆర్టీసీకి సూచించాడు.

ఇదిలా ఉంటే.. మరో నెటిజన్ మాత్రం టీజీఎస్ ఆర్టీసీకి ప్రత్యేక రిక్వెస్ట్ చేశారు. ప్రజా రవాణా వ్యవస్థను మెరుగుపరిచేందుకు ఎవరైనా ప్రయత్నించాల్సిందేనన్నారు. అయితే.. వోల్వో/గరుడ బస్సుల సర్వీసులను నిలిపివేసినందున.. ప్రతిరోజూ సిద్దిపేట, నిజామాబాద్ లేదా కరీంనగర్ వంటి పట్టణాలకు వెళ్లే ప్రజలు వేగంగా తమ గమ్యస్థానాలు చేసుకునేందుకు బస్సు సర్వీసులు లేవు. ఈ మార్గాల్లో చాలాకాలంగా ఎదురుచూస్తున్న కొత్త ఎలక్ట్రిక్ ఏసీ బస్సులను ప్రారంభించాలని టీజీఎస్ ఆర్టీసీకి ఓ నెటిజన్ రిక్వెస్ట్ చేశారు.