ఇసుక మాఫియాతో లింకులు.. ముగ్గురు సీఐలు, 13 మంది ఎస్సైలకు షాక్

ఇసుక అక్రమ రవాణాను అడ్డుకోవడంలో విఫలమైన సిబ్బంది విషయంలో పోలీస్ శాఖ తీవ్రంగా స్పందించింది. మల్టీజోన్‌-2 పరిధిలోని తొమ్మిది జిల్లాల్లో ఇందుకు బాధ్యులను గుర్తించి, చర్యలు తీసుకున్నారు. ముగ్గురు సీఐలు, 13 మంది ఎస్సైలపై వేటు పడింది. వీరిని వేకెన్సీ రిజర్వ్‌(వీఆర్‌)లో పెడుతూ జోన్‌ ఐజీపీ వి.సత్యనారాయణ గురువారం ఉత్తర్వులు వెలువరించింది. వీర్‌కు పంపినవారిలో సంగారెడ్డి రూరల్, తాండూరు రూరల్, తాండూరు టౌన్‌ సర్కిల్ ఇన్‌స్పెక్టర్లతోపాటు వీపనగండ్ల, బిజినేపల్లి, తెలకపల్లి, వంగూరు, ఉప్పునూతల, సంగారెడ్డి రూరల్, పెద్దేముల్, యాలాల్, తుంగతుర్తి, ఆత్మకూర్‌(ఎస్‌), పెన్‌పహాడ్, వాడపల్లి, హాలియా సబ్-ఇన్‌‌స్పెక్టర్లు ఉన్నారు.

సమగ్ర దర్యాప్తు అనంతరం ఈ వ్యవహారంలో ప్రత్యక్షంగా, పరోక్షంగా సహకరించిన వ్యక్తులను గుర్తించి శాఖాపరమైన చర్యలు తీసుకోనున్నారు. రాష్ట్ర నిఘా వర్గాల నివేదికలు, విచారణల ఆధారంగా సీఐ, ఎస్సైలపై చర్యలు తీసుకున్నట్టు ఐజీ కార్యాలయం గురువారం ఒక ప్రకటనలో వెల్లడించింది. వీరితో పాటుగా గతంలో కూడా ఇసుక అక్రమ రవాణా కట్టడిలో విఫలమైన ఒక సీఐ, అడవిదేవిపల్లి, వేములపల్లి, నార్కట్‌పల్లి, చండూర్, మాడుగులపల్లి, తిప్పర్తి, చింతలపాలెం, తిరుమలగిరి, నాగారం, బాజిరెడ్డిగూడెం, అచ్చంపేట, బొంరాస్‌పేట్, తాండూరు, చిన్నంబావి ఎస్సైలపై బదిలీ వేటు వేశారు.

ఇసుక అక్రమ రవాణాలో వసూళ్లకు పాల్పడినట్లు తేలడంతో కొండమల్లేపల్లి హోంగార్డు, జడ్చర్ల హెడ్‌- కానిస్టేబుల్‌ను కూడా ఇప్పటికే డిస్ట్రిక్ట్‌ ఆర్మ్‌డ్‌ రిజిర్వ్‌డ్‌ (డీఆర్జీ) కార్యాలయాలకు అటాచ్‌ చేశారు. కాగా, ఇసుక మాఫియాతో చేతులు కలిపి.. ప్రభుత్వ ఆదాయానికి గండికొడుతున్నారుని, ఈ వ్యవహారాన్ని సహించేది లేదని డీజీపీ జితేందర్ రెడ్డి తేల్చి చెప్పారు. వాగులు, నిషేధిత ప్రాంతాల్లో అక్రమ తవ్వకాలతో పర్యావరణానికి తీవ్ర ముప్పు కలిగే అవకాశాలు ఉన్నాయని, ఈ దందాను అణిచివేయాలని ఆయన ఆదేశించారు.

ఇకపై ఇసుక దందా జరిగితే సంబంధింత పోలీసు ఉన్నతాధికారిని బాధ్యులను చేస్తామని డీజీపీ హెచ్చరించారు. దీంతో ఇసుక మాఫియాతో సంబంధాలు పెట్టుకున్న పోలీసు అధికారుల్లో కలవరం మొదలైంది. అంతేకాదు, ప్రభుత్వం ఈ అంశాన్ని చాలా సీరియస్‌గా తీసుకోవడంతో ఎక్కడ తమ ఉద్యోగాలకు ఎసరు వస్తుందోనని ఆందోళనలో ఉన్నారు.