ఈ దసరాకు అలాయ్‌-బలాయ్ తీసుకుంటూ ఈ పని చేయండి.. యువతకు హరీష్ సూచన

తెలంగాణ ప్రభుత్వంపై మాజీమంత్రి, బీఆర్ఎస్ ఎమ్మెల్యే హరీష్ రావు తీవ్రస్థాయిలో ఫైరయ్యారు. ట్విట్టర్ వేదికగా విమర్శనాస్త్రాలు సంధించారు. ఎన్నికల ముందు ఇచ్చిన ఏ ఒక్క హామీని పూర్తిగా నెరవేర్చలేదని చెప్పారు. కాంగ్రెస్‌కు ఓటు వేయాలని గ్రామాల్లో ప్రచారం చేసిన యువత కాంగ్రెస్ మోసాన్ని గుర్తించాలన్నారు. తమ భవిష్యత్తును నమ్మి ఓటేస్తే.. కాంగ్రెస్ ప్రభుత్వం మోసం చేసిందని దుయ్యపట్టారు. ఈ సందర్భంగా యువతకు కీలక సూచన చేశారు. ఈ దసరాకు అలాయ్-బలాయ్‌తో పాటుగా కాంగ్రెస్ చేసిన మోసాల గురించి చర్చించుకోవాలన్నారు.

'గత ఏడాది దసరా సందర్భంగా కాంగ్రెస్ ఇచ్చిన ఆరు గ్యారెంటీలను నమ్మి తమ భవిష్యత్తు కోసం కాంగ్రెస్‌కు ఓటు వేయాలని గ్రామాల్లో ప్రచారం చేసిన యువత ఒక్కసారి ఆలోచించాలి. గ్యారెంటీలు అమలు చేయలేకపోగా, మీ ఊళ్లలో అవ్వాతాతలకు పెంచుతామన్న పింఛన్ పెంచలేదు, రుణమాఫీ పూర్తి చేయలేదు, రైతు బంధును నిలిపివేశారు, రైతు భరోసా దిక్కులేకుండా పోయింది, బోనస్‌ను బోగస్ చేశారు.

ఏడాదిలో 2 లక్షల ఉద్యోగాలు అన్నరు, పది నెలలు గడిచాయి. అయినా అతీ గతి లేదు. నాలుగు వేల నిరుద్యోగ భృతికి నీళ్లు వదిలారు. ఈ దసరాకు మీ ఊళ్లకు వస్తున్న కుటుంబ సభ్యులు, స్నేహితులతో అలాయ్ ‌- బలాయ్ తీసుకుంటూ కాంగ్రెస్ చేసిన మోసాల గురించి చర్చించండి. మీ ప్రాంతాల్లోని కాంగ్రెస్ నాయకులను ఆరు గ్యారెంటీలతో పాటు, రైతు డిక్లరేషన్, యూత్ డిక్లరేషన్, ఎస్సీ, ఎస్టీ డిక్లరేషన్, మైనారిటీ డిక్లరేషన్, బీసీ డిక్లరేషన్‌లపై ఎక్కడిక్కడ నిలదీయాలని పిలుపునిస్తున్నాను.' అని హరీష్ రావు ట్వీట్ చేశారు.

కాంగ్రెస్ ప్రభుత్వంపై బీఆర్ఎస్ వర్కింగ్ ప్రెసిడెండ్ కేటీఆర్ సైతం తీవ్ర విమర్శలు చేశారు. తమ ప్రభుత్వ హయాంలో పండగలా ఉన్న వ్యవసాయాన్ని దండగ చేశారని మండిపడ్డారు. పొలం ఉన్న రైతులనూ పొట్టుబెట్టుకుంటున్నారని.. కౌలు తీసుకున్న కర్షకులనూ కబళిస్తున్నారని విమర్శించారు. ఒకే రోజు ముగ్గురు అన్నదాతలు బలికావడానికి ముమ్మాటికీ రైతు వ్యతిరేక రేవంత్ సర్కారే కారణమని ఆరోపించారు.

'ఓవైపు సాగునీటి సంక్షోభం.. మరోవైపు రుణమాఫీ ద్రోహం. ఇంకోవైపు రైతుభరోసా మోసం. కౌలు రైతులకూ అందని సాయం. రైతుకు రక్షణ వలయంగా ఉన్న పథకాలను ఒక్కొక్కటిగా ఎగ్గొట్టడంతోనే వ్యవసాయంలో ఈ విలయం. వందలాది రైతులు పిట్టల్లా రాలిపోతున్నా చలనం లేదు. ముఖ్యమంత్రికి సోయి లేదు.. ప్రభుత్వానికి బాధ్యత లేదు. దసరా పండుగ వేళ.. వ్యవసాయాన్ని దండుగలా మార్చిన.. సీఎం రేవంత్‌కు రైతన్నల చేతిలో దండన తప్పదు. అన్నదాతలారా ఆత్మస్థయిర్యం కోల్పోకండి..! ముంచే రోజులు పోతాయ్.. మళ్లీ మంచిరోజులొస్తాయ్.' అని కేటీఆర్ ట్వీట్ చేశారు.