ఐఐఐటీహెచ్ ఆధ్వర్యంలో వికీమీడియా టెక్నాలజీ సమ్మిట్

ఇంటర్నెట్ యుగంలో వికీపీడియా ఆవిష్కరణ ఒక అద్భుతం. సింగిల్ క్లిక్‌తో ప్రపంచంలోని సమస్త అంశాలపై సమాచారాన్ని తెలుసుకునే వెసులుబాటు దీని వల్ల కలిగింది. విద్యార్థులు, ఉద్యోగులు, గృహిణులు, వృత్తి నిపుణులు.. ఇలా ఏజ్ గ్రూప్‌తో సంబంధం లేకుండా అందరికీ ఉపయోగపడేది వికీపీడియా. వినియోగదారులకు దీన్ని మరింత సులభతరం చేసేందుకు హైదరాబాద్‌లోని ఇంటర్నేషనల్ ఇన్‌స్టిట్యూట్ ఆఫ్ ఇన్ఫర్మేషన్ టెక్నాలజీ ప్రయత్నం చేస్తోంది. ముఖ్యంగా.. ఇంగ్లిష్‌తో పాటు భారతీయ భాషల్లో వికీపీడియా కంటెంట్‌ను అందించేందుకు తీవ్ర ప్రయత్నాలు జరుగుతున్నాయి. ఈ క్రమంలో ఐఐఐటీ, హైదరాబాద్ ఆధ్వర్యంలో హైదరాబాద్‌లో ‘వికీమీడియా టెక్నాలజీ సమ్మిట్ 2024’ జరిగింది.

రెండు రోజుల పాటు జరిగిన ఈ సమావేశంలో ఐఐఐటీ హైదరాబాద్ క్యాంపస్‌లో ఒక-రోజు హ్యాకథాన్, గచ్చిబౌలిలోని హోటల్ హయత్‌లో సమ్మిట్ జరిగింది. దేశవ్యాప్తంగా 130 మంది ప్రతినిధులు ఈ సమావేశానికి హాజరై తమ అభిప్రాయాలను పంచుకున్నారు. ఓపెన్ సోర్స్ టెక్నాలజీ, వికీమీడియా ప్రాజెక్ట్‌లలో తాజా ట్రెండ్స్, ఆవిష్కరణల గురించి చర్చించారు.

అక్టోబర్ 3 నుంచి 5 వరకు జరిగిన ఈ సమావేశంలో దేశం నలుమూలల నుంచి వికీమీడియా ప్రాజెక్ట్‌లకు సంబంధించిన సాంకేతిక నిపుణులు, డెవలపర్లు, కమ్యూనిటీ లీడర్లు, వికీక్లబ్ సభ్యులు (దేశంలోని వివిధ కాలేజీలకు సంబంధించిన విద్యార్థుల గ్రూపు) పాల్గొన్నారు. ‘వికీ టెక్ ఫర్ ఆల్: ఎంపవరింగ్ వాయిసెస్, ఎక్స్‌పాండింగ్ హారిజాన్స్’ పేరుతో జరిగిన ఈవెంట్‌లో చిన్న భాషలపై ప్రత్యేక దృష్టి సారించారు.

ఇండిక్ మీడియావికీ డెవలపర్స్ యూజర్ గ్రూప్, వికీమీడియా ఫౌండేషన్ సహకారంతో ఐఐఐటీ, హైదరాబాద్ ఈ సమావేశాన్ని నిర్వహించింది. విభిన్న వికీమీడియా వినియోగదారుల అవసరాలను తీర్చడానికి అవసరమైన సాంకేతిక ఆవిష్కరణలను అభివృద్ధి చేయడానికి సహకారం అందించేందుకు, విజ్ఞాన మార్పిడికి ఈ వేదిక ఒక ప్రత్యేక అవకాశాన్ని కల్పించింది. నిపుణులు, సాంకేతిక అనుభవజ్ఞులతో ఇంటరాక్ట్ అయ్యేందుకు విద్యార్థులకు అవకాశం కలిగింది.

దేశీయ భాషలలో కంటెంట్ అభివృద్ధిపై ఆసక్తికరమైన సెషన్‌లు జరిగాయి. ఏఐ ప్రభావంపై ఈ సమావేశంలో ప్యానెల్ చర్చ జరిగింది. వీటితో పాటు వయనాడ్ విపత్తు, వికీమీడియా ఫౌండేషన్ ద్వారా కొన్ని తాజా ఫీచర్లు, సాధనాలు; మొబైల్ ఎడిటింగ్, వాయిస్, ఇమేజ్ ఆధారిత స్క్రిప్ట్‌లు, భారతీయ భాషల సాధనాలు సహా అనేక సాంకేతిక అంశాలను కవర్ చేసే వికీమీడియా కమ్యూనిటీలపై చర్చ జరిగింది.

‘ఇండిక్-లాంగ్వేజ్ కమ్యూనిటీలకు మరింత సాంకేతిక మద్దతును అందించేందుకు మా దీర్ఘకాలిక ప్రయత్నంలో వికీమీడియా టెక్నాలజీ సమ్మిట్ 2024 అనేది మరో విజయవంతమైన కార్యక్రమం’ అని ఐఐఐటీ హైదరాబాద్‌ అసోసియేట్ ప్రొఫెసర్ రాధికా మామిడి అన్నారు. ప్రోగ్రామ్ మేనేజర్ కృపాల్ కశ్యప్‌తో పాటు ఈ సమావేశాన్ని విజయవంతం చేసిన అందరికీ ఆమె కృతజ్ఞతలు తెలిపారు. ఈ సమ్మిట్ హ్యాకథాన్ షోకేస్‌తో ముగిసింది.