మారిపోనున్న సీఎం రేవంత్ సొంతూరి రూపురేఖలు.. రూ.200 కోట్లతో అభివృద్ధి పనులు

ఎంత ఎత్తుకు ఎదిగిన కన్నతల్లి, పుట్టిన ఊరిని మర్చిపోవొద్దు అంటుంటారు. అచ్చంగా అదే చేస్తున్నారు తెలంగాణ సీఎం రేవంత్ రెడ్డి. తన సొంతూరయిన కొండారెడ్డిపల్లిని తెలంగాణ రాష్ట్రంలోనే ఆదర్శ గ్రామంగా తీర్చిదిద్దేందుకు అన్ని రకాల చర్యలు తీసుకుంటున్నారు. నాగర్‌కర్నూల్ జిల్లా వంగూరు మండలంలోని కొండారెడ్డిపల్లిలో పుట్టి పెరిగిన రేవంత్ రెడ్డి.. ప్రస్తుతం రాష్ట్రానికి ముఖ్యమంత్రిగా ఎదిగారు. తనను ఇంతవాన్ని చేసిన ఊరికి ఎంతో కొంత చేయాలని భావిస్తున్న రేవంత్ రెడ్డి.. దీపం ఉన్నప్పుడు ఇల్లు చక్కదిద్దుకోవాలన్న సామెతను అనుసరిస్తున్నారు. ఈ క్రమంలోనే.. కొండారెడ్డిపల్లిలో ఏకంగా రూ.200 కోట్లతో అభివృద్ధి పనులు చేయిస్తున్నారు.

కొండారెడ్డిపల్లి గ్రామ అభివృద్ధికి ఇప్పటికే ప్రభుత్వం రూ.30 కోట్లు మంజూరు కాగా.. మరో రూ.170 కోట్ల పనులకు సంబంధించిన ప్రతిపాదనలను అధికారులు ప్రభుత్వానికి పంపించారు. ఇప్పటికే.. కొండారెడ్డిపల్లిలో సుమారు రూ.72 లక్షలు పెట్టి గ్రామపంచాయతీ భవనం నిర్మించగా.. దానికి రేవంత్ రెడ్డి తండ్రి అయిన ఎనుముల నరసింహారెడ్డి పేరు పెట్టారు.

ఇదిలా ఉంటే.. రూ.45 లక్షలతో వెటర్నరీ హాస్పిటల్, రూ.70 లక్షలతో బీసీ కమ్యూనిటీ హాల్, రూ.39 లక్షలతో ఎస్సీ కమ్యూనిటీ హాల్ రెనోవేషన్, రూ.25 లక్షలతో బల్క్ మిల్క్ కూలింగ్ సెంటర్, మోడ్రన్ బస్ షెల్టర్, పార్క్, ఓపెన్ జిమ్, రైతు వేదిక పునరుద్ధరణ, రోడ్ల నిర్మాణం చేపడుతున్నారు. ఈ అభివృద్ధి పనులను దసరా రోజు సీఎం రేవంత్ రెడ్డి చేతుల మీదుగా ప్రారంభించేందుకు అధికారులు కసరత్తు చేస్తున్నారు.

ఇప్పటికే.. రాష్ట్రంలో చేపట్టబోయే కేంద్ర ప్రభుత్వ పథకమైన పీఎం సూర్య ఘర్ ముఫ్త్ బిజిలీ యోజనను ముందుగై తన కొండారెడ్డిపల్లిలోనే ప్రాంరభించేందుకు కసరత్తు కూడా చేస్తున్నారు. రాష్ట్రంలోనే పూర్తి సోరరైజ్డ్ గ్రామంగా కొండారెడ్డిపల్లిని తీర్చిదిద్దలన్న భావనతో.. అక్కడే పైలెట్ ప్రాజెక్టు మొదలుపెట్టారు.

అందులో భాగంగానే.. సెప్టెంబర్ నెలలో అధికారులు సర్వే కూడా చేశారు. కొండారెడ్డిప‌ల్లిలో సుమారు 499 గృహ వినియోగదారులు, 66 కమర్షియల్ కస్టమర్లతో పాటు 867 వ్యవసాయ వినియోగదారులు, ఇతర కేట‌గిరిల‌తో కలుపుకుని మొత్తంగా 1451 విద్యుత్ వినియోగదారులు ఉన్నట్టు అధికారులు గుర్తించారు. ఇప్పటికే.. ఇండ్లకు రూఫ్ టాప్ సోలార్ ప్యానెల్స్ కూడా ఏర్పాటు చేస్తున్నారు.