దసరా పండగ వేళ మందుబాబులకు షాక్.. రెండు రోజులు మద్యం దుకాణాలు బంద్

తెలంగాణలో దసరా సంబరాలు మెుదలయ్యాయి. గతరాత్రి సద్దుల బతుకమ్మ ఘనంగా జరగ్గా... రేపు విజయ దశిమి దసరా జరపుకోనున్నారు. అయితే తెలంగాణలో దసరా పండగ అంటే ఖచ్చితంగా మందు, మాసం ఉండాల్సిందే. సుక్క లేనిదే పండగకు కిక్కు ఉండదు. ఓ సినిమాలో చెప్పినట్లు తెలంగాణలో మద్యం వ్యసనం కాదు.. అలవాటు పడిన సాంప్రదాయం. దసరా రోజు దాదాపు ప్రతి ఇంట్లోనూ మద్యం సేవిస్తుంటారు. అలాంటి దసరా పండగ వేళ మందుబాబులకు షాకింగ్ న్యూస్. రెండ్రోజుల పాటు మద్యం దుకాణలు బంద్ కానున్నాయి. అయితే తెలంగాణ వ్యాప్తంగా కాదు.. కేవలం నిర్మల్ జిల్లాలో మాత్రమే.

దసరా పండుగను పురస్కరించుకుని నిర్మల్ జిల్లాలో 2 రోజులు మద్యం దుకాణాలు మూసివేయాలని జిల్లా ప్రొహిబిషన్ ఎక్సైజ్ అధికారులు గురువారం (అక్టోబర్ 10) రోజున ఉత్తర్వులు జారీ చేశారు. నిర్మల్లో ఈనెల 12న దుర్గాదేవి నిమజ్జనం నిర్వహించనున్నారు. ఈ నేపథ్యంలో ఎటువంటి అవాంఛనీయ ఘటనలు చోటు చేసుకోకుండా.. నేటి ఉదయం 10 నుంచి ఆదివారం (అక్టోబర్ 13) ఉదయం 10 గంటల వరకు మద్యం దుకాణలు బంద్ చేయాలని ఆదేశాలు జారీ చేశారు.

ఇక ముధోల్, భైంసాలో 13న దుర్గాదేవి నిమజ్జనం సందర్భంగా శనివారం (అక్టోబర్ 12) ఉదయం 10 నుంచి సోమవారం (అక్టోబర్ 14) ఉదయం 10 గంటల వరకు మద్యం దుకాణాలు మూసి ఉంచాలని ఆదేశించారు. సున్నితమైన ప్రాంతాల్లో ఎటువంటి ఘటనలు చోటు చేసుకుండా ఈ నిర్ణయం తీసుకున్నట్లు అధికారులు చెబుతున్నారు. అయితే పండగ వేళ మంద్యం దుకాణాలు మూసివేయటంపై మందుబాబులు ఆవేదన వ్యక్తం చేస్తున్నారు. సుక్క లేకుండా పండగ ఎట్ల అయితదని నిట్టూరుస్తున్నారు.

ఇక దసరా సందర్భంగా తెలంగాణలో మద్యం ఏరులై పారుతోంది. దసరా పండుగకు ముందు వరుస సెలవుల నేపథ్యంలో మద్యం అమ్మకాలు భారీగా పెరిగినట్లు ఎక్సైజ్ అధికారులు వెల్లడించారు. గత 9 రోజుల్లో రూ.713.25 కోట్ల మద్యం అమ్మకాలు జరిగినట్లు అధికారులు స్పష్టం చేశారు. రేపు దసరా కావడంతో ఈ మూడు రోజుల్లో సేల్స్ ఎక్కువగా జరుగుతాయని అంచనా వేస్తున్నారు. గత ఏడాదితో పోలిస్తే రూ.350 కోట్ల అమ్మకాలు అదనంగా ఉండొచ్చని అధికారులు భావిస్తున్నారు. అయితే ఈ సారి బీర్ల కంటే లిక్కర్ అమ్మకాలే ఎక్కువ జరుగుతున్నట్లు వెల్లడించారు.