ఎంతో మందితో కేసీఆర్ ఆడుకున్నారు... అందులో నేనూ ఒకడ్ని

తెలంగాణ మాజీ ముఖ్యమంత్రి, భారత రాష్ట్ర సమితి అధ్యక్షుడు కల్వకుంట్ల చంద్రశేఖర్‌పై కాంగ్రెస్ సీనియర్ నేత, మాజీ ఎంపీ రవీంద్రనాయక్ సంచలన ఆరోపణలు చేశారు. ఉద్యమం ముసుగులో మాజీ సీఎం కేసీఆర్‌ అన్ని వర్గాల ప్రజలు, ఉద్యమకారులను తీవ్రంగా మోసం చేశారని ఆయన అన్నారు. కేసీఆర్ బాధితులు చాలామంది ఉన్నారని, టీఆర్‌ఎస్‌ ఆవిర్భావ సభ్యుడిగా ఉన్న తనను తెలంగాణ భవన్‌ నుంచి బయటకు గెంటేశారని ఆరోపించారు. సోమాజిగూడ ప్రెస్‌క్లబ్‌లో ఆయన విలేకర్లతో మాట్లాడుతూ.. . కొట్లాడి తెచ్చుకున్న తెలంగాణను అప్పుల పాల్జేసిన ఘనత ఒక్క కేసీఆర్‌కే దక్కుతుందని మండిపడ్డారు.

పదేళ్లలో సుమారు రూ.8 లక్షల కోట్లు అప్పులు చేశారని విమర్శించారు. సీఎం రేవంత్‌రెడ్డి ప్రజాపాలన చేస్తున్నారని, ఆయనకు రాష్ట్రప్రజలు అండగా ఉండాలని విజ్ఞప్తి చేశారు. ఎంతో మంది నాయకుల రాజకీయ భవిష్యత్తుతో ఆడుకున్న కేసీఆర్.. వారిని పార్టీ నుంచి బయటకు పంపారని ధ్వజమెత్తారు. గిరిజనులు, మహిళలకు టికెట్లు ఇవ్వలేదని ఆరోపణలు చేశారు. తెలంగాణ సాకారమై కేసీఆర్‌ సీఎం అయిన తర్వాత క్విడ్‌ప్రో పేరుతో ప్రభుత్వ భూములను స్వాహా చేశారని అన్నారు. వేలాది ఎకరాల అసైన్డ్‌, నయీం, దేవాదాయ, వక్ఫ్‌, మిగులు భూములు కబ్జా చేయడమే కాకుండా వాటిని మాయం చేశారని ఆరోపించారు.

కేసీఆర్ వల్లనే ఆయన కుమార్తె కల్వకుంట్ల కవిత జైలుకు వెళ్లాల్సి వచ్చిందని విమర్శించారు. గత ప్రభుత్వ హయాంలో వందల సంఖ్యలో చెరువులు కనుమరుగయ్యాయని, ఒకవేళ మళ్లీ కేసీఆర్ కుటుంబంలో ఎవరైనా సీఎం అయితే తెలంగాణ నాశనం తప్పదని పేర్కొన్నారు. కేసీఆర్‌ కుట్రలు, కుతంత్రాలను అడ్డుకుందామని ఈ సందర్భంగా ఆయన పిలుపునిచ్చారు. కాగా, అధికార కాంగ్రెస్, ప్రతిపక్ష బీజేపీల మధ్య గత కొన్ని రోజులుగా మాటల యుద్ధం సాగుతోంది. రుణమాఫీ, హైడ్రా కూల్చివేతులు, మూసీ సుందరీకరణ సహా అనేక అంశాలపై బీఆర్‌ఎస్‌ చేస్తోన్న విమర్శలకు.. అధికార కాంగ్రెస్ అంతేస్థాయిలో కౌంటర్ ఇస్తోంది. సవాళ్లు, ప్రతి సవాళ్లతో తెలంగాణ రాజకీయాలు వెడేక్కాయి. ఈ నేపథ్యంలో రవీంద్ర నాయక్ కేసీఆర్ లక్ష్యంగా విమర్శలు గుప్పించారు.