ఖాకీ డ్రెస్, చేతిలో లాఠీ,,,,డీఎస్పీగా ఛార్జ్ తీసుకున్నారు క్రికెటర్ సిరాజ్

టీమిండియా ఆటగాడు, హైదరాబాద్ పేసర్ మహ్మద్ సిరాజ్.. డీఎస్పీగా (డిప్యూటీ సూపరింటెండెంట్‌ ఆఫ్‌ పోలీస్‌) బాధ్యతలు స్వీకరించారు. ఖాకీ డ్రెస్సు ధరించి, చేతిలో లాఠీ పట్టిన ఫోటో సోషల్ మీడియాలో వైరల్ అవుతోంది. మహ్మద్‌ సిరాజ్‌.. శుక్రవారం (అక్టోబర్ 12) తెలంగాణ డీజీపీ డాక్టర్‌ జితేందర్‌ను కలిసి రిపోర్ట్‌ చేశారు. ఆయన చేతుల మీదుగా జాయినింగ్ లెటర్‌ను తీసుకున్నారు. ఈ కార్యక్రమంలో పోలీసు ఉన్నతాధికారులు మహేష్ భగవత్, రమేశ్‌తో పాటు ఎంపీ అనిల్‌కుమార్‌ యాదవ్‌ పాల్గొన్నారు. టీ20 వరల్డ్ కప్ సాధించిన భారత జట్టులో సభ్యుడైన మహ్మద్ సిరాజ్‌కు ముఖ్యమంత్రి రేవంత్ రెడ్డి.. గ్రూప్-1 ఉద్యోగంతో పాటు, 600 చదరపు గజాల స్థలాన్ని కేటాయించిన సంగతి తెలిసిందే. క్రీడాకారులను ప్రోత్సహించాలనే ఉద్దేశంతో ముఖ్యమంత్రి రేవంత్‌ రెడ్డి సిరాజ్‌కు గ్రూప్‌-1 అధికారిగా ఉద్యోగం ఇచ్చారు. జూబ్లీహిల్స్‌ రోడ్‌ నంబర్‌ 78లో సిరాజ్‌కు రెవెన్యూ అధికారులు 600 చదరపు గజాల స్థలాన్ని కేటాయించారు.

నిరుపేద కుటుంబానికి చెందిన మహ్మద్ సిరాజ్‌ ఎంతో కష్టపడి పైకెదిగారని, భారత క్రికెట్‌ జట్టులో స్థానం సంపాదించారని ముఖ్యమంత్రి రేవంత్ రెడ్డి గతంలో కొనియాడారు. హైదరాబాద్ నగరానికి ఖ్యాతి తెచ్చిపెట్టారని ప్రశంసించారు. క్రీడాకారులను ప్రోత్సహించాలనే లక్ష్యంతోనే సిరాజ్‌కు గ్రూప్‌-1 అధికారిగా ఉద్యోగం కల్పించామని చెప్పారు.

సీఎం రేవంత్‌ రెడ్డి ఆదేశాల మేరకు ఈ ఏడాది ఆగ‌స్టులో జూబ్లీహిల్స్‌ రోడ్‌ నంబర్‌ 78లో 600 చదరపు గజాల స్థలాన్ని సిరాజ్‌కు కేటాయిస్తూ రెవెన్యూ శాఖ ఉత్తర్వులు జారీ చేసింది. తాజాగా సిరాజ్‌కు డీఎస్పీ పోస్టు కేటాయించారు. ఈ సంద‌ర్భంగా రాష్ట్ర ప్రభుత్వానికి, పోలీసు శాఖ‌కు సిరాజ్ కృత‌జ్ఞత‌లు తెలిపారు.

టీమిండియా క్రికెటర్‌గా ఏడేళ్లుగా సేవలు అందిస్తున్నాడు సిరాజ్. ఐసీసీ టీ20 వ‌ర‌ల్డ్ క‌ప్ ట్రోఫీతో హైదరాబాద్‌లో అడుగుపెట్టిన సిరాజ్‌కు నాడు శంషాబాద్ విమానాశ్రయంలో.. అభిమానుల నుంచి ఘన స్వాగతం లభించింది. అనంతరం సీఎం రేవంత్‌ రెడ్డిని ఆయన నివాసంలో మర్యాదపూర్వకంగా కలిశారు సిరాజ్.

క్యాన్సర్‌తో ధైర్యంగా పోరాడాలి

హైదరాబాదీ పేసర్ సిరాజ్.. క్యాన్సర్‌తో బాధపడుతున్న చిన్నారులను కలిసి, వారితో కాసేపు సరదాగా గడిపారు. శుక్రవారం బంజారాహిల్స్‌లోని రెయిన్‌బో ఆస్పత్రికి వచ్చారు. క్రికెట్‌ మ్యాచ్‌లో క్యాచ్‌ను వదులుకోవడం వల్ల గెలిచే అవకాశాలను చేజార్చుకుంటామని, అలాగే జీవితంలో ఆత్మవిశ్వాసం, భావోద్వేగ సమతుల్యతను కోల్పోవడం నష్టం చేస్తుందని సిరాజ్ అన్నారు. క్యాన్సర్‌తో పోరాడడంలో ధైర్యమే గొప్ప ఆయుధమని, నమ్మకంతో సవాళ్లను ఎదుర్కోవాలని సూచించారు.