రైతు భరోసా ఎకరానికి రూ.15 వేలు ఎప్పుడిస్తారు..?

తెలంగాణ ప్రభుత్వం అనేక రైతు సంక్షేమ పథకాలు అమలు చేసిన సంగతి తెలిసిందే. ఇప్పటికే రూ.2 లక్షల రైతు రుణమాఫీ అమలు చేయగా.. రైతు భరోసా పథకం కోసం అన్నదాతలు ఎదురు చూస్తున్నారు. పంట సాగు కోసం గత ప్రభుత్వం రైతుబంధు పథకం కింద ఎకరాకు రూ.10 వేలు రెండు విడతల్లో ఇవ్వగా.. అదే పథకాన్ని రైతు భరోసా మార్చి పంట పెట్టుబడి సాయంగా ఎకరాకు రూ.15 వేలు (ఖరీఫ్, రబీ సీజన్‌లో) ఇస్తామని కాంగ్రెస్ ప్రభుత్వం ప్రకటించింది. అయితే కాంగ్రెస్ ప్రభుత్వం అధికారంలోకి వచ్చి దాదాపు 10 నెలలు గడుస్తున్నా.. ఈ పథకం అమల్లోకి రాలేదు.

ఈ నేపథ్యంలో రైతు భరోసా పథకం అమలుపై తాజాగ వ్యవసాయశాఖ మంత్రి తుమ్మల నాగేశ్వరరావు కీలక అప్డేట్ ఇచ్చారు. గత ప్రభుత్వ హయంలో ఎంత భూముంటే అంతకు రైతుబంధు పంట పెట్టుబడి సాయం అందించారన్నారు. కొండలు, గుట్టలు, రియల్ ఎస్టేట్ వెంచర్లు, సాగులో లేని భూములకు సైతం పెట్టుబడి సాయం అందించారన్నారు. దాదాపు 25 వేల కోట్లు రైతుల ఖాతాల్లో జమ చేశారని.. ఈ మేరకు తమకు ఫిర్యాదులు అందాయని అన్నారు. తమ ప్రభుత్వంలో మాత్రం కేవలం సాగులో ఉన్న భూములకే రైతు భరోసా నిధులు జమ చేస్తామన్నారు.

అందుకోసం సబ్ కమిటీ ఏర్పాటు వేసినట్లు చెప్పారు. విధివిధానాలు ఖరారు కాగానే.. రాబోయే పంట కాలం నుంచి రైతు ఖాతాల్లో రైతు భరోసా పంట సాయం అందిస్తామన్నారు. రైతులే తమ ప్రభుత్వ తొలి ప్రాధాన్యత అని.. పంటలను మద్దతు ధరకు కొనుగోలు చేయనున్నట్లు చెప్పారు. రైతు సంక్షేమం కోసం దేశంలో ఎక్కడాలేని విధంగా బడ్జెట్‌లో రూ.50 వేల కోట్లు కేటాయించినట్లు చెప్పారు. గత ప్రభుత్వం పెండింగ్‌లో పెట్టిన రైతుబంధుతో పాటుగా 18 వేల కోట్ల రూ.2 లక్షల రైతు రుణమాఫీ చేసినట్లు చెప్పారు. పేర్లు, ఆధార్ కార్డుల్లో తప్పులుంటే 3 లక్షల రైతుల ఇండ్లకు వెళ్లి వారికి రుణమాఫీ అందజేశామన్నారు.

ఇప్పటికే రూ.25 వేల కోట్లు ఖర్చు చేశామని.. ఈ ఏడాది చివరికల్లా మరో రూ.25 వేల కోట్లు ఖర్చు చేయనున్నట్లు వెల్లడించారు. తెలంగాణ ప్రభుత్వం చిన్న రాష్ట్రమైనా.. ఆర్థికంగా ఇబ్బందులు ఉన్నా రైతు సంక్షేమాన్ని దృష్టిలో ఉంచుకొని ఇరిగేషన్, ఉచిత విద్యుత్ అందిస్తున్నామన్నారు. రైతు రుణమాఫీ గురించే ఏ ప్రభుత్వం, పార్టీలు ఆలోచించలేదని విమర్శించారు. అలాంటి వారు తమ ప్రభుత్వం గురించి మాట్లాడితే ప్రజలు క్షమించరన్నారు. కాంగ్రెస్ ప్రభుత్వానికి సహకరించాలని సూచించారు.