జూబ్లీహిల్స్‌లోని హోటల్‌లో భారీ పేలుడు.. పలువురికి తీవ్ర గాయాలు
Telangana Telugu | Suryaa Desk | Published : Sun, Nov 10, 2024, 07:50 PM
ఏసీ కంప్రెషర్ లేదా ఫ్రిజ్ కంప్రెషర్ పేలడంతో భారీ పేలుడు సంభవించినట్లు ప్రాథమికంగా గుర్తించారు. భారీ పేలుడుతో రెస్టారెంట్ ప్రహరీ రాతి గోడ పూర్తిగా ధ్వసం అయింది. అయితే హోటల్ పక్కనే దుర్గా భవానీ బస్తీలో కొందరు పేదలు సిమెంట్ రేకులతో తాత్కాలికంగా నిర్మించిన షెడ్లలో నివాసం ఉంటున్నారు. ప్రహరీ గోడ రాళ్ల ఎగిరిపడి వారి బస్తీలోని ఇండ్లపై పడటంతో ఐదు ఇండ్లు పూర్తిగా ధ్వసం అయ్యాయి. ఓ మహిళ, మరో బాలికకు తీవ్ర గాయాలయ్యాయి. గాయాలపాలైన వారిని వెంటనే ఆసుపత్రికి తరలించారు. ప్రస్తుతం వారికి ఆసుపత్రిలో చికిత్స అందిస్తున్నారు. వారికి ఎటువంటి ప్రమాదం లేదని వైద్యులు తెలిపారు.
ఇక సమాచారం అందుకున్న పోలీసులు వెంటనే స్పాట్‌కు చేరుకొని సహాయక చర్యలు ముమ్మరం చేశారు. కంప్రెషర్ పేలుడు ద్వారానే ఈ ఘటన చోటు చేసుకుందని పోలీసులు ప్రాథమికంగా గుర్తించారు. ఈ మేరకు కేసు నమోదు చేసుకొని విచారణ చేపట్టారు. విచారణ తర్వాత పేలుడుకు గల కారణాలు తెలుస్తాయన్నారు. ఇదిలా ఉండగా.. గాఢ నిద్రలో ఉండగా.. ఒక్కసారిగా పేలుడు శబ్దం రావటంతో చుట్టు పక్కల ప్రాంతాల ప్రజలు భయాందోళనలకు గురయ్యారు. తాము గత 40 ఏళ్లుగా ఈ బస్తీలో ఉంటున్నామని బాధితులు వెల్లడించారు. చిన్న చిన్న పనులు చేసుకొని కుటుంబాన్ని పోషించుకునే తాము పేలుడు ధాటికి సర్వం కోల్పోయామని ఆవేదన వ్యక్తం చేశారు. ప్రభుత్వం తమను ఆదుకోవాలని కోరుతున్నారు. కాగా, ఈ ప్రమాదంలో ప్రాణ నష్టం జరగకపోవటంతో అందరూ ఊపిరి పీల్చుకున్నారు.
|
|